سەرۆککۆماری ئێران ستایشی هەوڵەکانی ئیسلام ئابادی کرد بۆ چەسپاندنی ئاشتی و جەختی لەوە کردەوە کە وڵاتەکەی ئامادەیە بۆ بەرگریکردن لە سەروەریی خاکەکەی لە بەرامبەر هەر سەرکێشییەکی ئەمریکا و ئیسرائیل. پزیشکیان ئاماژەی بەوەش کرد کە تاران دەیەوێت پەیوەندییەکانی لەگەڵ وڵاتانی کەنداو پەرەپێ بدات، بەڵام بە مەرجێک دوور بێت لە دەستێوەردانی ئەکتەرە دەرەکییەکان و ئەو وڵاتانەی دەبنە هۆی تێکدانی ئاسایشی ناوچەکە.

لای خۆیەوە، شەهباز شەریف سەرۆکوەزیرانی پاکستان هاوڕای تاران بوو لەسەر پێویستی کۆتاییهێنان بە شەڕ و پێکدادانەکان و پزیشکیانی لە ئەنجامی دواین راوێژە دیپلۆماسییەکانی وڵاتەکەی لەگەڵ وڵاتانی ناوچەکە ئاگادار کردەوە. شەریف ئاماژەی بەوە کرد کە پاکستان بەردەوام دەبێت لە هەوڵە راستگۆیانەکانی بۆ پاراستنی سەقامگیریی ناوچەیی و لەو چوارچێوەیەشدا سوپاسی هەماهەنگییەکانی ئێرانی کرد.

لە کۆتایی پەیوەندییەکەدا، هەردوولا جەختیان لە گرنگیی بەردەوامیی گفتوگۆکان کردەوە، بەتایبەت دوای سەردانەکەی ئەم دواییەی سوپاسالاری پاکستان بۆ تاران. سەرۆکوەزیرانی پاکستان دووپاتی کردەوە کە ئیسلام ئاباد بە پشتیوانی هاوبەشەکانی پابەند دەبێت بە دۆزینەوەی رێگەچارەی ئاشتییانە، لە کاتێکدا تاران هۆشداری دەدات کە هەر جۆرە هەڵەیەکی سەربازی لە ناوچەکەدا لێکەوتی مەترسیداری بۆ ئاسایشی جیهانی دەبێت.

هەزاران سەربازی ئەمریکی و فلیپینی دەستیان بە مانۆڕە سەربازییە ساڵانەکانیان کرد، کە ئەمساڵ بۆ یەکەمجار هێزێکی سوپای ژاپۆنیش تێیدا بەشدارە.

ئەم مانۆڕانە مەشق و راهێنانی بە تەقەمەنی زیندوو دەکرێت لە ناوچەکانی باکووری فلیپین کە دەڕواننە سەر دەربەندی تایوان، هەروەها لەو ناوچانەی دەکەونە سەر دەریای چینی باشوور، کە ناوچەیەکی جێناکۆکە و بەردەوام گرژی لەنێوان هێزی دەریایی فلیپین و چین تێیدا روودەدات.

عەقید دێنس هێرناندێز، وتەبێژی هێزەکانی فلیپین رایگەیاند کە سوپای ژاپۆن بە1400 سەرباز بەشداری دەکات و موشەکی کروزی جۆری 88 بۆ نوقمکردنی کەشتییەک لە کەناراوەکانی "باوای" باکوور بەکاردەهێنێت.

کۆلۆنێل ڕۆبێرت بان، وتەبێژی هێزەکانی ئەمریکا رایگەیاند کە ئەم مانۆڕە نیشانەی "هاوپەیمانییەکی بەهێزە لەگەڵ فلیپین" و جەختی لە پابەندبوونی واشنتون کردەوە بۆ ناوچەیەکی ئازاد و کراوە لە زەریای هیندی و هێمن.

هەروەها ئاماژەی بەوە کرد کە شەڕی رۆژهەڵاتی ناوەڕاست کاریگەری لەسەر ژمارەی هێزە بەشداربووەکانی ئەمریکا نابێت.

ئەم جووڵە سەربازییانە لە کاتێکدایە کە چین فشارە سەربازییەکانی بۆ سەر تایوان زیاد کردووە، ، فێردیناند مارکۆس، سەرۆکی فلیپین پێشتر هۆشداری دابوو کە بەهۆی نزیکی وڵاتەکەی لە تایوان، هەر جەنگێک لەو ناوچەیەدا رووبدات، فلیپین بەبێ ویستی خۆی پەلکێشی ناو ململانێکان دەکرێت، مارکۆس رێککەوتنامەی بەرگری هاوبەشی ساڵی 1951ی نێوان مانیلا و واشنتون بە کۆڵەکەیەکی سەرەکی ئاسایشی وڵاتەکەی دادەنێت.

رۆژنامەی ئیسرائیل هیۆم بڵاویکردوەتەوە، ئێران رەزامەندی دەربڕیوە بە رادەستکردنی یۆرانیۆمە پیتێندراوەکە بە وڵاتێکی تر، بەڵام  ئەو وڵاتە ئەمریکا نییە.

ئەمڕۆ یەکشەممە لە راپۆرتێکی رۆژنامە ئیسرائیلیەکەدا هاتووە، ئێران بە مەرجی رادەستکردنی یۆرانیوەمە پیتێندراوەکەی رازی بووە، بەڵام نایەویت رادەستی ئەمریکای بکات.

رۆژنامەکە ئەوەشی خستوەتەڕوو، پێدەچێت یەکێک لە ناکۆکییە گەورەکانی نێوان لایەنەکان چارەسەر بکرێت، بەڵام هێشتا ئێران هیچ نیشانەیەکی ئامادەیی نیشان نەداوە بۆ دەستبەرداربوون لە بەرنامەی موشەکی بالیستیکی خۆی.

ئاماژەی بەوەشکردوە، ئەگەر ئەم نەرمی نواندنەی ئێران بەردەوام بێت، رەنگە ئەمریکا ماوەی ئاگربەست درێژ بکاتەوە.