د.لەتیف رەشید سەرۆک کۆماری عیراق، ئەمڕۆ دووشەممە 14 ی نیسانی 2025 لەکۆشکی سەلام لەبەغداد، داتاکانی هەڵبژاردن و کارتی بایۆمەتری خۆی لەسەرۆکایەتی کۆمار نوێکردەوە.

سەرۆک کۆمار جەختی لەچڕکردنەوەی هەوڵەکان کردەوە بۆ نوێکردنەوەی دەنگدەران کارتی دەنگدانیان بۆ دەستەبەرکردنی مافی بەشداریکردن وهاوکات ئاماژەی کرد بە گرنگی ئەنجامدانی هەڵبژاردنی پەرلەمان لەوادەی دیاریکراودا، بۆ ئەوەی عیراقییەکان نوێنەرانی خۆیان هەڵبژێرن.

سەرۆک کۆمار داوای لەکۆمیسیۆنی هەڵبژاردنەکان کرد هەوڵەکانی خۆی بخاتە گەڕ بۆ هاندان و هۆشیارکردنەوەی هاووڵاتیان بەمەبەستی بەشداریکردن لەهەڵبژاردنەکاندا و هەڵبژاردنی نوێنەرانیان بەئازادی و شەفافییەت و ئاماژەی بەوەشکرد کە سەرۆکایەتی کۆمار پشتیوانی لە کۆمیسیۆنی هەڵبژاردنەکان دەکات لەپێناو تەواوکردنی پرۆسەی هەڵبژاردن بەئاسانی و سەرکەوتووانە بۆ بەدیهێنانی ئاواتەکانی سەرجەم گەل لە پێشکەوتن و خۆشگوزەرانی.