د.لەتیف رەشید سەرۆك کۆماری عیراق لە کۆشکی بەغداد پێشوازی لە د.باسم بەدری سەرۆکی دەستەی لێپرسینەوە و دادپەروەری کرد و دووپاتیکردەوە، کە پێویستە دادپەروەری بنەمای کاری دەستەکە بێت بە جۆرێك مامەڵەی لەگەڵ سەرجەم دۆسییەکان بە شێوەیەکی دادپەروەرانە و یەکسان بێت.

لەو دیدارەدا، بنەماکانی کاری دەستەی لێپرسینەوە و دادپەروەری و میکانیزمەکانی کارکردنی لەسەر دۆسییە جیاوازەکان تاووتوێکران،  لەم چوارچێوەیەدا سەرۆك کۆمار جەختیکردەوە، پێویستە دادپەروەری بنەمای کاری دەستەکە بێت بەجۆرێك مامەڵەی لەگەڵ سەرجەم دۆسییەکان بەشێوەیەکی دادپەروەرانە و یەکسان بێت و هاوکات گرنگی سەربەخۆیی کاری دەستەکەی دووپاتکردەوە.

لای خۆیەوە د.باسم بەدری پوختەیەکی لەبارەی کار و چالاکییەکان و قۆناغەکانی مێژووی دەستەکە لە بارودۆخە سیاسییە جیاوازەکاندا پێشکەشکرد و دووپاتیکردەوە، سورن لەسەر بەدیهێنانی دادپەروەری بەوپەڕی شەفافیەت و دادپەروەرییەوە.