ئەمڕۆ سەرۆک کۆماری عیراق پێشوازی باڵیۆزی کۆماری سربیا لە عیراق و سەرۆکی دەستەی وەبەرهێنان لە دەسەڵاتی دانوبی سربیا کرد و بانگهێشتنامەی رەسمی سەرۆک کۆماری سربیایان پێشکەش بە د.لەتیف رەشید کرد بۆ کۆنفرانس و پێشانگەی نێودەوڵەتی EXPO 2027.

ئەمڕۆ دووشەممە، د.لەتیف رەشید سەرۆک کۆماری عیراق، لە کۆشکی بەغدا پێشوازی کرد لە براتیسلاڤ جیگێڵ باڵیۆزی کۆماری سربیا لە عیراق و محەمەد ئەلمحەیسن سەرۆکی دەستەی وەبەرهێنان لە دەسەڵاتی دانوبی سربیا.

لە سەرەتای کۆبوونەوەکەدا، سەرۆک کۆمار بانگهێشتنامەیەکی رەسمی پێگەیشت، کە لەلایەن هاوتا سربییەکەی ئەلیکساندەر ڤوچیچ بۆ بەشداریکردن لە کۆنفرانس و پێشانگای نێودەوڵەتی "Expo 2027" ئاراستەی کرابوو.

هەر لەو کۆبوونەوەیەشدا، چۆنیەتی پەرەپێدانی پەیوەندییە دووقۆڵییەکانی نێوان هەردوو وڵات بەتایبەتی لە بوارەکانی ئابوری و وەبەرهێنان تاوتوێکرا و تێیدا سەرۆک کۆمار جەختی لە گرنگی بەهێزکردنی هەماهەنگیی نێوان لێپرسراوانی وەبەرهێنان لە هەردوو وڵاتدا کردەوە، لەپێناو رەخساندنی ژینگەیەکی گونجاو بۆ ئاڵوگۆڕی دەرفەتی وەبەرهێنان و ئاسانکاری رێوشوێنەکان بۆ بازرگانان و وەبەرهێنەران و کردنەوەی ئاسۆیەکی نوێ بۆ هاریکاری هاوبەش لە بوارە گرنگەکاندا، کە خزمەت بە بەرژەوەندییەکانی هەردوو وڵات دەکات.

لای خۆیەوە، براتیسلاڤ جیگێڵ خواستی وڵاتەکەی بۆ فراوانکردنی ئاسۆی هاوکاری لەگەڵ عێراق دەربڕی و جەختی لەوە کردەوە، سربیا خواستی هەیە بۆ هاوبەشی ستراتیژی کە بەرژەوەندییە هاوبەشەکان بەدی بهێنێت.

دوای ئەوەی سێ رۆژ لەمەوپێش کچێک بەناوی ئاڤێستا لە سنوری قەزای مێرگەسور کەوتە ئاوەوە، تاوەکو ئێستا تەرمەکەی نەدۆزراوەتەوە و بەرگری شارستانیی سۆرانیش دەڵێت، لە گەڕان بەدوای تەرمەکەیدا بەردەوامن.

بەرگری شارستانیی سۆران رایگەیاند، ئەمڕۆ بۆ سێیەم رۆژ لەسەریەک تیمەکانیان بەردەوامن لە گەڕان بەدوای تەرمی ئاڤێستا یوسفی تەمەن 27 ساڵدا، کە رۆژی هەینی رابردوو لە سنوری قەزای مێرگەسور کەوتە ئاوەوە و گیانی لەدەستدا.

ئاماژەی بەوەشکردووە، نۆ تیم و تیمی فڕۆکەوانی هەولێر بەشدار بوون لە گەڕان بەدوای تەرمەکەیدا، بەڵام بەهۆی لێڵی و بەخوڕی ئاوی رووبارەکە نەتوانراوە تەرمەکەی بدۆزرێتەوە.

ئەوەش لە کاتێکدایە، شەوی رابردوو، وتەبێژی بەرگری شارستانیی ئیدارەی سۆران رایگەیاند، پێشبینی دەکەن دۆزینەوەی تەرمی ئاڤێستا نزیکەی دوو هەفتە بخایەنێت.

رۆژی هەینی رابردوو، ئاڤێستا یوسفی تەمەن 27 ساڵ، کە پیشەی مامۆستا بوو، کەوتە ناو رووباری تەنگاتوری سنوری قەزای مێرگەسور و بەهۆیەوە گیانی لەدەستدا.

بەپێی زانیارییەکانی کوردسات نیوز، ئاڤێستا لەگەڵ کەسوکارەکەیدا بۆ گەشت و سەیران چووبوونە نزیک رووبارەکە.