لەگەڵ دەستپێكردنی جەنگی ئێران و ئیسرائیل، ئێران هەڕەشەی بەكارهێنانی بەهێزترین كارتی فشاری كردووە، كە ئەویش داخستنی گەرووی هورمزە، كە هەستیارترین رێڕەوی ئاوی نێودەوڵەتییە. 

هەڕەشەی داخستنی گەرووەكە ئەمجارە لە زاری ئیسماعیل كەوسەری سەركردە لە سوپای پاسداران و ئەندامی پەرلەمانی ئێرانەوە بوو، كە وتبووی داخستنی لەژێر تاوتوێ كردندایە و بڕیاری دروست لەبارەیەوە دەدەن.

داخستنی گەرووی هورمز كاریگەری گەورە لەسەر ئابوری جیهان دروست دەكات، بەشێوەیەك بەرزبوونەوەی نرخی نەوت و هەڵاوسانی لێدەكەوێتەوە.

ئەو گەرووە تەنها بۆ ئێران گرنگ نییە، بەڵكو وڵاتانی گەورە لە رێكخراوی ئۆپیك پشتی پێدەبەستن، وەك سعودیە و ئیمارات و كوەیت و عیراق، كە زۆرینەی نەوتە خاوەكەیان لەو رێیەوە هەناردە دەكەن بە تایبەت بۆ بازاڕەكانی ئاسیا.

بە داخستنیشی، وڵاتانی وەك كوەیت و قەتەر و بەحرەین و ئیمارات و سعودیە زیانی گەورەیان بەردەكەوێت.

هاوكات عیراق یەكێك دەبێت لە زەرەرمەندترین وڵاتەكان، فوئاد حسێن وەزیری دەرەوەی عیراقیش وتبووی، ئەگەر جەنگەكە داخستنی هورمزی لێبكەوێتەوە، كارەساتی ئابوری گەورە دروست دەبێت و رەنگە نرخی یەك بەرمیل نەوت بگاتە 200 بۆ 300 دۆلار.

گەرووی هورمز گرنگترین رێڕەوی ئاوییە لە جیهاندا، دەكەوێتە نێوان عومان و ئێران و كەنداوی عەرەبی بە كەنداوی عومان و دەریای عەرەب دەبەستێتەوە. زیاتر 20%ی نەوتی جیهانی پێدا تێدەپەڕێت، واتە زیاتر لە 17 ملیۆن بەرمیل لە رۆژێكدا. نەك تەنها نەوت بەڵكو سێ یەكی هەناردەی جیهان لە غازی سروشتی بە تایبەتە لە قەتەرەوە پێیدا تێپەڕ دەبێت. 
ئێران چەند جارێك هەڕەشەی داخستنی گەرووی هورمزی كردووە، دیارترینیان لە ساڵی 2018 بوو، كاتێك ئەمریكا لە رێككەوتنی ئەتۆمی كشایەوە، لە 2011 و 2012ش جارێكی تر هەڕەشە كرا لەسەر ئەوەی وڵاتانی رۆژئاوا سزای زیاتر نەخەنە سەر هەنارەی نەوتی ئێران، بەڵام هیچ كات لە هەڕەشەكان جێبەجێنەكراون، چونكە بە وتەی شارەزایان لەڕووی كردارییەوە داخستنی ئەو گەرووە ئاسان نییە، چونكە بەشێكی زۆری دەكەوێتە عومانەوە و هێندە فراوانە كە ئێران ناتوانێت دایبخات.