حوسییەکانی یەمەن لە میانی پەیوەندی و گفتوگۆکانیان لەگەڵ عەرەبستانی سعودیە بۆ کۆتاییهێنان بە شەڕ و ململانێکان، داوای وەرگرتنی 51 ملیار دۆلار و بە رەسمی ناساندنی دەسەڵاتەکەیان لە یەمەن کردووە.

رۆژنامەی "واڵ ستریت جۆرناڵ"، لە راپۆرتێکدا بڵاویکردوەتەوە، حوسییەکانی یەمەن بۆ کۆتاییهاتنی شەڕ لەگەڵ سعودییە داوای 51 ملیار دۆلاریانکردوە وەک قەرەبوی زیانەکان.

لە راپۆرتەکەی، واڵ ستریت جۆرناڵدا هاتووە؛  حوسییەکان ئەم بڕە پارەیەیان وەک قەرەبووی ئەو زیانانە داواکردووە کە لە ئەنجامی ساڵانێک هێرشی ئاسمانی و گەمارۆدانی یەمەن لەلایەن سعودیە تووشیان بووە.

رۆژنامەکە ئاماژەی بەوەش کردووە،  عەرەبستانی سعودیە دوای توندتربوونی هێرشەکانی حوسییەکان بۆ سەر دامەزراوە نەوتییەکان و فڕۆکەخانەکانی ئەو وڵاتە و پێشڕەوییەکانیان بەرەو بەندەری عەدەن، روبەڕوی هەڵبژاردنی دژوار بووەتەوە.

بەپێی وتەی لێپرسراوانی سعودیە، محەمەد بن سەلمان، وەلیعەهدی عەرەبستانی سعودیە، ئارەزووی ئەوە ناکات بێ بەدەستهێنانی دەستکەوتی مەیدانی لە یەمەن دەستبکات بە گفتوگۆی گشتگیر لەگەڵ حوسییەکان، لە هەمان کاتدا نیگەرانە لەوەی ناردنی هێزی زیاتر بۆ یەمەن ببێتە هۆی زیانی گیانی قورس و ناڕەزایەتی ناوخۆیی.

 

ئەنجومەنی نوێنەرانی عیراق لەگەڵ وەزارەتی نەوت تاوتوێی پلانی بەرزكردنەوەی بەرهەمهێنانی نەوتی خاو بۆ 7 ملیۆن بەرمیل لە رۆژێكدا تا ساڵی 2032 دەكات.

لە كۆبوونەوەیەكی هاوبەشدا، لیژنەی هەرێمەكان، پارێزگاكان و پلاندانان لە ئەنجوومەنی نوێنەران میوانداریی وەزیری نەوتی عیراق و لێپرسراوانی باڵای وەزارەتەكەی كرد. لە دیدارەكەدا گفتوگۆ لەسەر ستراتیژی گەیشتن بە بەرهەمهێنانی 7 ملیۆن بەرمیل نەوت لە رۆژێكدا تا ساڵی 2032، پەرەپێدانی بۆرییە سەرەكییەكانی گواستنەوە و تەواوكردنی سێیەمین بۆریی دەریایی كرا بۆ ئەوەی دەروازەكانی هەناردەكردنی نەوت هەمەجۆر بكرێن.

لە راگەیاندراوێكی ئەنجوومەنی نوێنەراندا هاتووە بەشداربووان هۆكاری سستی و پەككەوتنی بەشێك لە پڕۆژەكانی غازیان لە ساڵی 2023ەوە تاوتوێ كردووە، بە ئامانجی وەبەرهێنان لە غازی بەرهەمهاتوو تا پێداویستیی ناوخۆیی پڕبكرێتەوە و پشت بە هاوردەكردن نەبەسترێت.جەختی لەسەر گرنگیی پەرەپێدانی پاڵاوگەی نەجەف، بەرەنگاربوونەوەی گەندەڵیی دارایی و بەدواداچوونی بەردەوام بۆ جێبەجێكردنی بڕگەكانی كارنامەی حكومەت كردەوە.

 

 

دەستەی نیشتمانی بۆ چاودێریی ئەتۆمی لە عیراق لەبارەی ئەگەری هەر هێرشێکی ئەتۆمی بۆسەر ناوچەکە راگەیەنراوێکی لەسەر ئەگەرەکان و کاریگەرییەکانی لەکاتی روودانیدا بڵاوکردەوە و تێیدا هاتووە: سەرجەم رێکارە تەکنیکی و خۆپارێزییەکانیان گرتووەتەبەر.

فازڵ حاوی مەزبان، سەرۆکی دەستەی نیشتمانیی بۆ چاودێریی ئەتۆمی لە عیراق لە راگەیەنراوێکدا رایگەیاند: دووریی پێگە مەبەستدارەکان بە سەدان کیلۆمەتر لە سنوورەکانی عیراق دوورن، سەرەڕای ئەوەش ئەو دامەزراوانە لە قوڵایی زیاتر لە 100 مەتر لە ژێر زەوی و لەناو شاخە بەردینەکاندان، بۆیە تەقینەوەی بۆمبی ئەتۆمییش لەو ناوچانە نابێتە هۆی ئەوەی نەتوانرێت پاشماوەکەی کۆنترۆڵبکرێت.

وتیشی، ئاراستەی با لە چینە بەرزەکانی کەشوهەوادا نیشتەنییە تیشکدەرەکان لە ئاسمانی عیراق دوور دەخاتەوە.

ئاماژەی بەوەشدا، سیستەمەکانی چاودێری و هۆشداریی پێشوەختە بەدرێژایی سنوورەکان چالاککراون و بە تۆڕە نێودەوڵەتییەکان و ئاژانسی نێودەوڵەتیی وزەی ئەتۆمەوە بەستراونەتەوە، بۆئەوەی بەخێرایی هەر گۆڕانکارییەکی نائاسایی لە ئاستی تیشکدانەوەدا دەستنیشان بکەن.

ئەم ئامادەکارییانەی بەغدادیش لە کاتێکدایە، لە ماوەی رابردوودا دۆناڵد ترەمپ، سەرۆکی ئەمریکا هەڕەشەی ئەنجامدانی هێرشی سەربازیی بۆ سەر چەند پێگەیەکی ئەتۆمیی ئێران کردبوو.