سوپای ئەمەریكا رایگەیاند، بەندەری نەوتی رەئس عیسایان لە یەمەن خاپوور كردووە كە سەرچاوەیەكی گەورەی داهات بووە بۆ حوسییەكان.

فەرماندەیی ناوەندیی ئەمریكا رایگەیاند، بەندەری نەوتی رەئس عیسایان تێكشكاندووە كە حوسییەكان لە یەمەن بەكاریاندەهێنا بۆ گواستنەوەی سوتەمەنی و نەوت و ماوەی 10 ساڵە سەرچاوەیەكی گەورەی داهاتیان بووە.

بەندەری رەئس عیسا یەكەم بەندەری یەمەنە كە ساڵی 1985 لە پارێزگای حودەیدە لەسەر دەریای سور دروستكراوە و رۆژانە زیاتر لە یەك ملیۆن و 400 هەزار بەرمیل نەوتی لێوە هەناردە كراوە.

لە سەرەتای سەرهەڵدانی شەڕی نێوان ئیسرائیل و حەماس لە كەرتی غەززە، حوسییەكان سەدان هێرشی مووشەكییان لە دژی ئیسرائیل و كەشتییەكانی دەریای سوور ئەنجامداوەو ئەمریكاش لە 15ی ئاداری رابردوەوە بە بەردەوام پێگەكانیان بۆردومان دەكات.

دوو بەرپرسی باڵای ئەمەریکا رایانگەیاند کە سوپای ئەمریکا لە هەشت بنکەی ئۆپەراسیۆنی بچووکی لە سوریا، سێ بنکەی دادەخات، بەمەش بوونی هێزەکانی لە دوو هەزارەوە بۆ نزیکەی هەزار و 400 سەرباز کەمدەکاتەوە.

دوان لەم بنکانە بە "گوندی سەوز" و "فورات" ناسراون.

کاربەدەستانی ئەمریکا بە نیو یۆرک تایمزیان راگەیاندوە؛ کە دوای 60 ڕۆژ سەرکردەکانی ئەمریکا ئەگەری کەمکردنەوەی زیاتر هەڵدەسەنگێنن.

بە وتەی بەرپرسێک؛ فەرماندەکان پێشنیاریان کردووە کە لانیکەم 500 سەربازی ئەمریکی لە سوریا بمێننەوە.

ئەو بەرپرسانە، بە نیویۆرک تایمزیان وتووە؛ ئەمبڕیارانە لەبەردەم پیاچونەوەدایەو پێدەچێت پنتاهۆن بە هەڵسەنگاندنی دۆخەکە بڕیار لە بەردەوامی کشانەوەکان بدات.

دۆناڵد ترەمپ، سەرۆکی ئەمەریکا رایگەیاندووە کە لە ئەنجامدانی کردەی سەربازی بۆ سەر دامەزراوە ئەتۆمییەکانی ئێران پەلەی نییە و جەختی کردووەتەوە کە بژاردەی یەکەمی دانوستانە.

بەپێی راپۆرتێکی رۆژنامەی نیویۆرک تایمز، ترەمپ بەرپرسانی ئیسرائیلی ئاگەدار کردووەتەوە کە پشتیوانی هیچ کردەیەکی سەربازی و هێرشێک بۆ سەر ئێران یان دامەرزاوە ئەتۆمییەکانی ئەو وڵاتە ناکات و راشیگەیاندووە لەم قۆناغەدا وازی لەم بژاردەیە هێناوە.

رۆژنامەکە ئەوەشی خستووەتەروو کە ترەمپ بڕوای وایە ئێران دەرفەتێکی باشی لە بەردەمە بۆ ئەوەی ببێتە وڵاتێکی گرنگ و کاریگەر، هەر بۆیە لەم قۆناغەدا دانوستان بژاردەی یەکەمی سەرۆکی ئەمەریکایە.

لە لێدوانەکانیدا بۆ بەرپرسانی ئیسرائیلی، ترەمپ وتوویەتی: "دانوستان بژاردەی یەکەمی منە، چونکە بژاردەی دووەم بۆ ئێران زۆر خراپە، بۆیە پێم وایە ئێران مەبەستی دانوستانە و بەهیوام دانوستان بکەن".

راپۆرتەکەی رۆژنامەی نیویۆرک تایمز لە کاتێکدایە کە بڕیارە شەممەی داهاتوو گەڕی دووەمی دانوستانەکانی ئێران و ئەمەریکا بە ئامادەبوونی رافائیل گروسی، بەڕێوەبەری گشتیی ئاژانسی نێودەوڵەتیی وزەی ئەتۆم لە رۆمای پایتەختی ئیتاڵیا بەڕێوە بچێت، دوای ئەوەی گەڕی یەکەم شەممەی رابردوو لە مەسقەت بەڕێوە چوو.