ئیسماعیل بەقایی، وتەبێژی وەزارەتی دەرەوەی ئێران رایگەیاند،  پێشوازی لە شکستخواردنی کۆمارییەکان لە هەڵبژاردندا دەکەن و بە هێرشکردنە سەر ئێران سەرکەوتن بەدەست نایەت.

ئەمڕۆ چوارشەممە، لە پەیامێکیدا لە ئێکس، ئیسماعیل بەقائیی، وتەبێژی وەزارەتی دەرەوەی ئێران رەخنەی توندی لە سیاسەتی ئەمریکا گرتووە و ئاماژەی بەوە کردووە، کە دەستدرێژیکردنە سەر ئێران لەژێر کاریگەریی هەڵەی مێشک و فێڵبازیی بنیامین ناتانیاهۆی سەرۆک وەزیرانی ئیسرائیلدا بووە.

ناوبراو،  جەختی کردەوە کە گەلی ئەمریکا، لەم هەڵبژاردنەدا پەیامێکی توندی دایە لێپرسراوانی ئەمریکا، کە جەنگیان لەگەڵ ئێران ناوێت.

بەقائیی ئاماژەی بەوەکردوە، "حوکمدان و هێرشکردن سەر ئێران سەرکەوتنی لێ ناکەوێتەوە و تەنیا بەرەو شکستت دەبات"

 ئەم قسانەی بەقائیی،  لە کاتێکدایە، دوای شکستەکەیان لە هەڵبژاردن، دۆناڵد ترەمپ، سەرۆکی ئەمریکا، سەرەڕای داننان بە کاریگەریی جەنگ لەسەر ئەنجامی هەڵبژاردنەکان، جەختی لەوە کردووە کە لە هێرشکردن سەر ئێران پەشیمان نییە و دوو ساڵی مێژویان بەڕێکردوە.

کۆنفرانسی نێودەوڵەتی منداڵان و گەنجان بە ئامادەبونی شاناز ئیبراهیم ئەحمەد  و شارەزایانی جیهانی و رۆژهەڵاتی ناوەڕاست  لە سلێمانی بەڕێوەچوو، تێیدا جەخت لەسەر دابینکردنی داهاتوویەکی سەلامەت بۆ نەوەی نوێ کرایەوە.

بە بەشداریی شارەزایانی جیهانی و ڕۆژهەڵاتی ناوەڕاست، ئەکادیمیستان و پەرۆشانی مافەکانی منداڵان، رێکخراوی منداڵپارێزی کوردستان بەهاوکاری زانکۆی سلێمانی، کۆنفرانسێکی زانستیی نێودەوڵەتی دەربارەی منداڵان و گەنجان رێکخست، لە یەکەم رۆژی کۆنفرانسەکەدا چەندین دیدگا و روانینی گرنگ سەبارەت بە داهاتووی منداڵان خرانەڕوو.

لەو پانێڵە ئاست بەرزەدا، خاتوو شاناز ئیبراهیم ئەحمەد وتارێکی پێشکەش کرد و رایگەیاند: هەمووان دەڵێین منداڵان ئایندەی وڵاتن، بەڵام ئەو ئایندەیەی کە بڕیارە سەقەتەکانی گەورەکان بۆیان دروست دەکەن و نازانن چۆن تیایدا بژین.

ناوبراو ئاماژەی بەوەش کرد،  کە لە سەردەمی ئێستادا منداڵان روبەڕووی تەکنەلۆژیا و خێرایی سەردەمی (ئەی ئای) و (ئای تی) بوونەتەوە و جەختیکردەوە ، پاراستنی مافی منداڵ تەنها بە بڕیاری حکومەت یان بەڵێنی سیاسی ناکرێت، بەڵکو بەرپرسیارێتییەکی گشتییە بۆ ئەوەی منداڵان لەسەر گۆڕانکاری و هیوا پەروەردە بکرێن نەک تەنها بۆ قەیران و شەڕ.

هەر لە کۆنفرانسەکەدا، سارا لەتیف رەشید، سەرۆکی رێکخراوی منداڵپارێزی کوردستان، جەختی لەسەر پێویستیی گوێگرتن لە داواکاری و بۆچوونەکانی منداڵان و ئەنجامدانی توێژینەوەی زانستی بۆ بڕیاردان لەسەر ژیان و داهاتوویان کردەوە.

هاوکات شازادە بەسمە کچی تەلال، باڵیۆزی رێزلێنراوی گەشەپێدانی مرۆیی بۆ بەرنامەی گەشەپێدانی نەتەوە یەکگرتووەکان (UNDP)، گرنگیی کاری پێکەوەیی بۆ فەراهەمکردنی ژینگەیەکی ئارام و دەرفەتی فێربوون بۆ گەنجان و منداڵان خستەڕوو.

لە کۆتایی کارەکانی یەکەم رۆژی کۆنفرانسەکەدا، ژمارەیەک منداڵ و گەنج لە تەمەنی جیاواز پانێڵێکیان بە ناوی "داهاتووی ئێمە پەیامی ئێمەیە" پێشکەش کرد و تێیدا داوایان کرد،  گوێیان لێ بگیرێت و بەشداریی پێبکرێت لەو رێسا و بڕیارانەی پەیوەندییان بە خۆیانەوە هەیە، جەختیشیان لەوە کردەوە کە پێویستە لە جیهانێکی دوور لە توندوتیژی و پڕ لە ڕێز و ژینگەیەکی پارێزراودا گەورە ببن.