بەهۆی گۆڕانکارییەکانی کەشوهەوا، پێشبینی دەکرێت لە زۆربەی ناوچەکانی هەرێم تاوەباران و هەورە بروسکە لە کاتە جیاوازەکاندا دەستپێبکات.

بەڕێوەبەرایەتی کەشناسی و بوومەلەرزەزانی هەرێم رایگەیاند، ئەمڕۆ ئاسمان نیمچە هەور دەبێت و لە کاتەکانی نیوەڕۆوە ئەگەری تاوەباران و هەورە بروسکە لە زۆربەی ناوچەکان هەیە، بەتایبەت لە ناوچە شاخاوییەکان کە رێژەکە زیاتر دەبێت.

ئاماژەی بەوەشکرد، سبەینێ سێشەممە، ئاسمان لە نێوان پەڵە هەور و نیمچە هەوردا دەبێت و لە هەندێک کاتدا دەگۆڕێت بۆ هەوری تەواو، پێشبینی تاوەبارانیش دەکرێت لە ناوچە شاخاوییەکانی پارێزگای دهۆک دەستپێدەکات، لە کاتەکانی شەوداویشدا  کاریگەرییەکەی بۆ ناوچەکانی تری هەرێم زیاد دەکات.

کەشناسی هەرێم ئەوەشی خستەڕوو، پلەکانی گەرما بەراورد بە ئەمڕۆ یەک بۆ سێ پلە نزمتر دەبنەوە.

ماڵپەڕی "ئەکسیۆس"ی ئەمریکی لە زاری لێپرسراوێکی ئەمریکی و چەند سەرچاوەیەکی ئاگادارەوە ئاشکرای کرد، ئێران لە رێگەی نێوەندگیری پاکستانییەوە پێشنیازێکی نوێی پێشکەشی ویلایەتە یەکگرتووەکانی ئەمریکا کردووە، کە ئامانج لێی گەیشتنە بە ریککەوتنێکی گشتگیر بۆ کۆتاییهێنان بە شەڕ و دووبارە کردنەوەی گەرووی هورمز.

بەپێی ڕاپۆرتەکە، پێشنیازە ئێرانییەکە داوا دەکات دانوستانە ئەتۆمییەکان بۆ قۆناغێکی دیکە دوابخرێن، ئەمەش وەک هەوڵێک بۆ تێپەڕاندنی ناکۆکییە ناوخۆییەکانی ئێران سەبارەت بەو سازشانەی کە پەیوەستن بە دۆسیەی ئەتۆمییەوە.

سەرچاوەکان ئاماژەیان بەوە کردووە کە عەباس عراقچی، وەزیری دەرەوەی ئێران، لە سەردانەکەیدا بۆ پاکستان تاوتوێی ئەم پێشنیازەی کردووە، کە لە قۆناغی یەکەمدا جەخت لەسەر چارەسەرکردنی تەنگژەی گەرووی هورمز و گەمارۆکانی ئەمریکا دەکاتەوە، دواتر و لە قۆناغەکانی داهاتوودا دەست بە دانوستانە ئەتۆمییەکان بکرێت.

هەروەها پێشنیازەکە درێژکردنەوەی ئاگربەست بۆ ماوەیەکی درێژ یان گەیشتن بە رێککەوتنێکی هەمیشەیی بۆ کۆتاییهێنان بە شەڕ لەخۆدەگرێت، پێش ئەوەی باس لە هەر رێککەوتنێکی ئەتۆمی بکرێت.

لە بەرانبەردا، وتەبێژی کۆشکی سپی رایگەیاندووە، ئەم گفتوگۆیانە "هەستیارن" و جەختی کردووەتەوە کە واشنتۆن لە رێگەی میدیاکانەوە دانوستان ناکات، هەروەها ئاماژەی بەوە کردووە کە دۆناڵد ترەمپ تەنها رێککەوتنێک ئیمزا دەکات کە لە بەرژەوەندی گەلی ئەمریکادا بێت و هەرگیز رێگە نادات ئێران ببێتە خاوەنی چەکی ئەتۆمی.

 بڕیاریشە ترەمپ ئەمڕۆ دووشەممە کۆبوونەوەیەک لەگەڵ لێپرسراوە باڵاکانی ئەنجام بدات بۆ تاوتوێکردنی بژاردەکانی بەردەم واشنتۆن و هەنگاوەکانی داهاتوو لە شەڕەکەدا، لە کاتێکدا عراقچی بە نێوەندگیرەکانی راگەیاندووە کە کۆدەنگییەکی ناوخۆیی لەناو سەرکردایەتی ئێراندا نییە سەبارەت بە داواکارییەکانی ترەمپ دەربارەی پیتاندنی یۆرانیۆم.