د. لەتیف رەشید سەرۆک کۆماری عیراق لەبارەی هێرشەکەی سەر ماڵی نێچیرڤان بارزانی سەرۆکی هەرێمی کوردستان لە دهۆک، بەیاننامەیەکی بڵاوکردەوە و تێیدا ئیدانەی هێرشەکە دەکات

دەقی راگەیەنراوەکە:

سەرکۆنەی ئەو پەلامارە دەکەین کە ماڵی نێچیرڤان بارزانی سەرۆکی هەرێمی کوردستانی کردە ئامانج لە پارێزگای دهۆک. ئەم هێرشە سەرپێچییەکی جددیە کە هەڕەشە لە ئاسایش و سەقامگیری وڵات دەکات و هەوڵەکان بۆ کەمکردنەوەی گرژییەکان و پاراستنی ئاشتی ناوخۆیی تێکدەدات.

داوا لە لایەنە ئەمنییەکان دەکەین بەدواداچوون بۆ ڕووداوەکە بکەن و بە پێی یاسا لێپرسینەوە لە بەرپرسیارانی بکەن.

ئێمە جەخت دەکەینەوە لەسەر گرنگی بەهێزکردنی هاریکاری و هەماهەنگی نێوان لایەنە پەیوەندیدارەکان لە حکومەتی فیدراڵی و حکومەتی هەرێمی کوردستان بۆ ڕێگریکردن لە دووبارەبوونەوەی ئەو جۆرە پەلامارانە و پاراستنی ئاسایشی هاوڵاتیان و دەزگاو دامەزراوەکانی حکومەت و ڕێگریکردن لە هەر هەوڵێک کە عێراق پلکێش دەکات بۆ ناو ململانێ ناوچەییەکان و کارکردن بۆ بەهێزکردنی یەکێتی نیشتمانی و پەنابردن بۆ گفتوگۆ لە پێناو پاراستنی سەقامگیری عێراق و پاراستنی ئاسایشی نیشتمانیی وڵات.

د.لەتیف جمال ڕەشید
سەرۆک کۆمار
٢٨-٣- ٢٠٢٦

 

فراکسیۆنی یەکێتیی نیشتمانیی کوردستان لە ئەنجومەنی نوێنەرانی عیراق، لە پەیامێکدا ئیدانەی بەئامانجگرتنی ماڵی نێچیرڤان بارزانی دەکات و دەڵێت: ئەم دەستدرێژییە تەنها هێرش نییە بۆ سەر کەسایەتییەکی نیشتمانی، بەڵکو دەستدرێژییەکی ئاشکرایە بۆ سەر ئاسایش و سەروەریی عیراق و هەرێم.

دەقی پەیامەکە...

بەنیگەرانیەکی قووڵەوە، چاودێری ئەو هەواڵانە دەکەین کە باس لە بەئامانجگرتنی ماڵی سەرۆکی هەرێمی کوردستان لە دهۆک، بەڕێز نێچیرڤان بارزانی دەکەین.

ئەم دەستدرێژییە تەنها هێرش نییە بۆ سەر کەسایەتییەکی نیشتمانی، بەڵکو دەستدرێژییەکی ئاشکرایە بۆ سەر ئاسایش و سەروەریی عێراق و هەرێمی کوردستان.

ئەم هێرشە پێشێلکارییەکی زەقە بۆ هەموو نەریت و یاساکان، و هەوڵێکی بێهودەیە بۆ تێکدانی ئاسایش لە ناوچە ئارامەکانی "دهۆک".

لە هەمان کاتدا، ئەمە کارێکی تیرۆریستییە و لە ژێر هیچ پاساوێکدا جێگەی قبوڵکردن نییە، ئامانجی سەرەکییەکەشی بڵاوکردنەوەی ترس و تۆقاندنە لە ناو هاووڵاتیانی سڤیل.

داوا لە حکومەتی فیدراڵ و لایەنە ئەمنییە پەیوەندیدارەکان دەکەین بە زووترین کات لێکۆڵینەوەیەکی خێرا و شەفاف دەستپێبکەن بۆ ئاشکراکردنی لایەنە تێوەگلاوەکان و ڕادەستکردنیان بە دادگا تا سزای دادپەروەرانەی خۆیان وەربگرن.

فراکسیۆنی یەکێتیی نیشتمانیی کوردستان لە ئەنجومەنی نوێنەرانی عیراق