هێزەکانی سوریای دیموکرات (هەسەدە) رایدەگەیەنێت، ئەو لێدوانانەی وتەبێژی وەزارەتی ناوخۆی حکومەتی سوریا سەبارەت بە کەمپی هۆڵ داویەتی، هەوڵێکە بۆ هەڵاتن لەو بەرپرسیارێتییەی دەکەوێتە ئەستۆیان و داپۆشینی ئەو شکستانەی لە بەڕێوەبردنی کەمپەکەدا روبەڕویان بووەتەوە.

ناوەندی راگەیاندنی هەسەدە لە راگەیەندراوێکدا ئاماژەی بەوەکردووە، پێش ئەو رووداوانەی لە کەمپی هۆڵ رویاندا، گروپە چەکدارەکانی سەر بە دیمەشق هێرشی راستەوخۆیان کردووە و هێزیان بەرەو کەمپەکە جوڵاندووە، تا ئەو ئاستەی پێکدادانەکان گەیشتوونەتە سەر دیوارەکانی کەمپەکە. ئەوەش هاوکات بووە لەگەڵ جوڵەی رێکخراوی خێزانەکانی داعش لە ناوەوەی کەمپەکە بۆ دروستکردنی ئاژاوە.

لە راگەیەندراوەکەدا هاتووە، لەبەردەم ئەو ئاڵۆزییە مەبەستدارە و بێدەنگییە گوماناوییەی کۆمەڵگەی نێودەوڵەتیدا، هێزەکانیان ناچار بوون پاشەکشە بکەن بۆ ئەوەی کەمپەکە نەبێتە گۆڕەپانێکی کراوەی جەنگ. دوای ئەوەش، ئەو گروپە چەکدارانە چوونەتە ناو کەمپەکەوە و لەبەردەم کامێرای چەکدارەکانی خۆیاندا دەستیانکردووە بە دەرکردنی خێزانەکانی داعش.

هەسەدە دەشڵێت، پرۆسەی قاچاغچێتی بە خێزانەکانی داعشەوە بۆ ماوەی زیاتر لە هەفتەیەک بە ئاشکرا و بە بەڵگەوە بەردەوام بووە، ئەویش لەژێر چاودێری و سەرپەرشتیی چەکدارانی وەزارەتەکانی بەرگری و ناوخۆی حکومەتی دیمەشقدا. جەختیشیکردووەتەوە کە ئەو لایەنانەی کۆنترۆڵی کەمپەکەیان کردووە بەرپرسیارن لەو دۆخە و ئەو راستییانەش بە دەنگ و رەنگ سەلمێنراون و بە لێدوانی چەواشەکارانە پەردەپۆش ناکرێن.

هەسەدە ئاماژە بەوەش دەکات، هێزەکانیان و بەڕێوەبەرایەتیی کەمپەکە بۆ ماوەی چەندین ساڵ، سەرەڕای ئاڵۆزیی دۆسیەکە و نەبوونی پاڵپشتیی پێویست و ئاڵەنگارییە ئەمنییە بەردەوامەکان، ئەرکی مرۆیی، ئەخلاقی و ئەمنیی خۆیان بەجێگەیاندووە و تەنیا خەمیان پاراستنی دانیشتووانی کەمپەکە و رێگریکردن بووە لە دروستبوونەوەی شانەکانی رێکخراوەکە لە ناوەوە یان دەرەوەی کەمپەکە.

لە کۆتایی راگەیەندراوەکەدا هەسەدە جەخت لەوە دەکاتەوە کە لێدوانە نابەرپرسانەکانی وتەبێژی وەزارەتی ناوخۆی سوریا، هەوڵێکی سیاسییە بۆ چەواشەکردنی رای گشتی و لادانی سەرنجەکان لەو کەلێنە ئەمنی و کارگێڕییانەی لە قۆناغی کۆنترۆڵکردنی کەمپەکە لەلایەن گروپە چەکدارەکانەوە دروستبوون. پاشەکشەی هێزەکانیشیان دەرەنجامی راستەوخۆی ئەو هێرشە سەربازییە بووە کە دیمەشق کردیە سەر کەمپەکە و دەوروبەری.