ئیلهام ئەحمەد، سیاسەتمەداری کورد، داوا لەو وڵاتانە دەكات كە پاڵپشتی دارایی هەندێك كەناڵی عەرەبی دەكەن، پێداچوونەوە بە سیاسەتی راگەیاندنیاندا بكەن بەرامبەر بە دۆسیەی سوریا و دەڵێت، ئەو كەناڵانە هانی کوشتنی پێکهاتەکان دەدەن.

لە پەیامێكدا لە تۆڕی كۆمەڵایەتی ئێكس، ئیلهام ئەحمەد داوایكردووە لێكۆڵینەوە لەو راپۆرتانە بكرێت كە ئەو كەناڵانە لەسەر دۆسیەی پێكهاتەكان بڵاویدەكەنەوە، چونكە راستییەكان دەشێوێنن و سورییەكان دژی یەكتر هان دەدەن.

ئاماژەی بەوەشكردووە، قۆرخكردنی چەك لە دەستی دەوڵەتدا، ئەو مافە بە دەوڵەت نادات توندوتیژی و ترساندن دژی گەل و كۆمەڵگە بەكاربهێنێت و یاساكانی مافی مرۆڤ پێشێل بكات.

سەبارەت بە دۆخی حەلەب، ئیلهام ئەحمەد دەڵێت، ئەو تاوان و پێشێلكارییانەی بەرانبەر كورد لە گەڕەكەكانی شێخ مەقسود و ئەشرەفیە ئەنجام دەدرێن، دەچنە خانەی تاوانی جەنگەوە.

رونیشیکردۆتەوە، رفاندنی گەنجان و کوشتنیان، دزی و تاڵانكردنی ماڵی مەدەنییەکان و شێواندنی تەرمی قوربانییەكان بەردەوامە، بۆیە داوا لە رێكخراوە نێودەوڵەتییەكانی مافی مرۆڤ و لێبوردنی نێودەوڵەتی دەكات بەپەلە دەستوەردان بكەن و بەدواداچوون بۆ دۆسیەی رفێندراوان و لێكۆڵینەوە لە رووداوەكانی ئەو دوو گەڕەكە بكەن.