شەیبانی: لەگەڵ ئیسرائیل ناچینە هیچ رێککەوتنێکەوە
محەمەد رزگار
٧ی کانونی یەکەمی ٢٠٢٥
وەزیری دەرەوەی سوریا دەڵێت: وڵاتەکەی لەگەڵ ئیسرائیل ناچێتە هیچ رێککەوتنێکەوە تا هێزەکانی تەلئەبیب لەناو خاکی سوریا نەکشێنەوە.
ئەسعەد شەیبانی وەزیری دەرەوەی سوریا لەمیانی کۆڕبەندی دەوحە رایگەیاند، سوریا ئاستێک لە ژیری و دیپلۆماسیەتی نیشانداوە بەرانبەر ئیسرائیل نیشانداوە، جەختیشی کردەوە خواستی دیمەشق ئەوەیە ئیسرائیل دەستوەردان لە کاروباری ناوخۆی سوریا رابگرێت و کاریگەری لەسەر ئایین و گروپەکانی دانیشتوان نەبێت.
وتیشی، سوریا ناچێتە هیچ رێککەوتنێکەوە لەگەڵ ئیسرائیل، ئەگەر لەو ناوچانە نەکشێتەوە کە دوای 8ی کانوونی یەکەم داگیری کردوون، ئاماژەی بەوەش دا کە ئیسرائیل لە 7ی کانوونی یەکەمەوە جێگەی نیگەرانی سورییەکان بووە.
سەبارەت بە رەوشی ناوخۆی سوریا شەیبانی ئەوەشی خستەڕوو، سوریا پێویستی بە سەقامگیری ئەمنی ناوخۆیی هەیە کە پەیوەندی بە ئاسایشی هەرێمییەوە هەبێت، هەروەها وتی سیاسەتی وڵاتەکەی خۆدوورگرتنە لە ئاڵەنگارییەکان بە پاڵپشتی ئیرادەیەکی نێودەوڵەتی سەرکەوتوو دەبێت.
"سوریا پێویستی بە پەیوەندییەکی ئارامە لەگەڵ هەمووان و پاڵپشتی کۆمەڵگەی نێودەوڵەتی"، وەزیری دەرەوەی سوریا وادەڵێت.
