حکومەتی هەرێمی کوردستان، لە رێگەی گشتاندنێکی سەرۆکایەتیی دیوانی ئەنجومەنی وەزیرانەوە، روماڵکردنی روداوەکانی تاوانی لەلایەن کەناڵەکانی میدیا و تۆڕە کۆمەڵایەتییەکانەوە قەدەغە کرد، کە بڵاوکردنەوەی دیمەن و ڤیدیۆی تاوانباران و شوێنی روداوەکان دەگرێتەوە.

بەپێی گشتاندنەکە کە ئاراستەی سەرجەم وەزارەت و دامودەزگاکانی حکومەت کراوە، لەمەودوا رێگە بە هیچ میدیایەک نادرێت دیمەنی روداوی تاوان، تۆمەتباران، و شوێن و کاتی روداوەکان بڵاوبکاتەوە و روماڵی بکات.

ئەم بڕیارە لەسەر بنەمای داواکارییەکی "دەستەی سەربەخۆی مافی مرۆڤ" لە هەرێمی کوردستان دەرچووە، کە داوای لە ئەنجومەنی وەزیران کردبوو رێگری لەم جۆرە روماڵانە بکرێت.

ئامانج لەم گشتاندنە، وەک لە راگەیەندراوەکەدا هاتووە، بریتییە لە پاراستنی رێڕەوی لێکۆڵینەوە یاساییەکان، رەچاوکردنی باری دەروونی و کۆمەڵایەتی هاوڵاتیان، و رێگریکردن لە بەکارهێنانی روداوەکان بۆ مەرامی سیاسی و دروستکردنی دووبەرەکی.

هەروەها جەخت لەسەر پاراستنی سەلامەتیی گشتی، ئاسایشی تاک و کۆمەڵگە، و رێزگرتن لە بنەماکانی مافی مرۆڤ کراوەتەوە.