مەزڵووم کۆبانێ، فەرماندەی گشتیی هێزەکانی سوریای دیموکرات (هەسەدە)، لە میانی سەردانێکی بۆ باکوور و رۆژهەڵاتی سوریا، لەگەڵ ئەدمیراڵ براد کوپەر، فەرماندەی فەرماندەیی ناوەندی ئەمریکا (سێنتکۆم) کۆبووەوە.

لە کۆبوونەوەکەدا، هەردوولا گفتوگۆیان دەربارەی دوایین گۆڕانکارییەکانی دیالۆگ لەگەڵ دیمەشق کرد.

سەرچاوەکان ئاماژەیان بەوەدا کە ئەدمیراڵ کوپەر لە میانی کۆبوونەوەکەدا جەختی لە پابەندبوونی ئەمریکا بۆ پشتیوانیکردنی هەسەدە و بەردەوامبوون لە کاری هاوبەش دژی تیرۆر، پاراستنی کەمپەکان و زیندانەکانی داعش کردەوە.

لەبارەی گفتوگۆکانیش لەگەڵ دیمەشق، مەزڵوم کۆبانێ، فەرماندەی گشتیی هەسەدە، پابەندبوونی خۆیان بۆ بەردەوامیدان بە پرۆسەی دانوستان و جێبەجێکردنی رێککەوتننامەی 10ی ئادار دووپات کردەوە.

مەزڵوم کۆبانێ، ئاماژەی بە پێویستیی هاندانی دیمەشق کرد بۆ بەردەوامیدان بە کار و گرتنەبەری هەندێک هەنگاو بۆ بنیاتنانی متمانە لە نێوانیاندا.