نەتەوە یەكگرتووەكان بۆ یەكەمینجار بە رەسمی ئاماری برسێتی لە غەززە بڵاوكردەوە و ئاماژەی بەوەكرد، 500 هەزار كەس بەدەست برسێتییەوە دەناڵێنن، وەزارەتی دەرەوەی ئیسرائیل رەتیدەكاتەوە و دەڵێت، هیچ برسێتییەك لە غەززە بوونی نییە.

ئەمڕۆ هەینی، نەتەوە یەكگرتووەكان بە رەسمی ئاماری برسێتی لە غەززە بڵاوكردەوە، كە بۆ یەكەمینجارە ئامارێكی لەو جۆرە لە رۆژهەڵاتی ناوەڕاستدا بڵاوبكرێتەوە و رایگەیاند، ئەوەی لە غەززە روودەدات برسێتییەكی كارەساتبارە.

نەتەوە یەكگرتووەكان ئاماژەی بەوەكردووە، 500 هەزار كەس لە غەززە بەدەست برسێتییەوە دەناڵێنن و ئەگەر رێگری لێ نەكرێت، تا مانگی ئەیلول ئامارەكە بۆ نزیكەی 650 هەزار كەس بەرز دەبێتەوە.

لە بەرانبەرادا وەزارەتی دەرەوەی ئیسرائیل ئامارەكانی نەتەوە یەكگرتووەكانی رەتكردەوە و رایگەیاند، برسێتی لە غەززە بوونی نییە و ئەوەی باس دەكرێت، وتەی ناڕاستی حەماسە بۆ مەبەستی سیاسی خۆیان بەكاری دەهێنن.