سوریا و ئیسرائیل لەسەر 80٪ی خاڵەکانی نێوانیان رێککەوتون
رەوەز فازیل
٢١ی ئابی ٢٠٢٥
هەردوو حکومەتی سوریا و ئیسرائیل لە پاش ئەنجامدانی کۆبونەوەکانی نێوانیان بەتەواوەتی نزیکن لە ئەنجامدانی رێککەوتنێکی گشتگیر لە نێوانیاندا.
سەرچاوەیەکی تایبەت بە کەناڵی ئەلحەدەسی سعودی راگەیاند، سوریا و ئیسرائیل لەسەر نزیکەی 80%ی خاڵەکانی نێوانیان رێککەوتون، کە ئەوەش ئاماژەیە بۆ ئەوەی دیمەشق و تەلئەبیب رێککەوتون لەسەر بەردەوامبوون لە دانوستانە ئەمنییەکانیانی نێوانیان لە ئازەربایجان و فەرەنسا.
ئاماژەی بەوەشکردوە، رێکخستنە ئەمنیەکانی باشوری سوریا نزیکە لەوەی بەتەواوەتی جێبەجێبکرێت.
ئەو سەرچاوەیە رونیشیکردوەتەوە، تۆم باراک نێردەی تایبەتی ئەمریکا بۆ کاروباری سوریا داوای لە ئەسعەد شەیبانی وەزیری دەرەوەی سوریا کردوە رونکردنەوەی تەواوەتی بدات لەسەر ئەوگرتە ڤیدیۆیانەی پێشێکاریەکان بەرانبەر دروزەکان لە پارێزگای سوەیدا پیشاندەدەن.
ئەوەش دوای ئەوەدێت، ئەسعەد شەیبانی وەزیری دەرەوەی سوریا، لەگەڵ وەفدێکی ئیسرائیل لە پاریسی پایتەختی فەرەنسا کۆبووەوە و تیایدا باسیان لە پرسەکانی پەیوەست بە باشووری سوریا و هەوڵەکان بۆ بەرزکردنەوەی سەقامگیری ناوچەکە کرد.
لە میانی دیدارەکەدا، رێککەوتنێک ئەنجامدرا بۆ چڕکردنەوەی هەوڵەکان بۆ کەمکردنەوەی گرژییەکان و دوورکەوتنەوە لە دەستوەردان لە کاروباری ناوخۆی سوریا.
