سەرۆكی ئاژانسی نێودەوڵەتی وزەی ئەتۆم گەشبینە بە دانوستانەكانی نێوان ئێران و ئەمریكا و جەختیش دەكاتەوە لەوەی توانا ئەتۆمیەكانی ئێران بە هێرشی سەربازی لەناوچێت.

رافائیل گرۆسی سەرۆكی ئاژانسی نێودەوڵەتی وزەی ئەتۆم لە چاوپێكەوتنێكیدا لەگەڵ رۆژنامەی فاینانشاڵ تایمز رایگەیاند، گەشبینە بە ئەنجامی دانوستانە ناڕاستەخۆكانی نێوان ئەمریكا و ئێران ستایشی هەوڵەكانی دۆناڵد ترەمپیشی كرد بۆئەنجامدانی دانوستان لەگەڵ ئێران و راشیگەیاند، ستیڤ ویتكۆف كەسێكی جدیە بۆ ئەنجامدانی ئەو ئەركە.

لە بەشێكی دیكەی قسەكانیدا گرۆسی جەختیكردەوە لەوەی، توانا ئەتۆمییەكانی ئێران بە هێرشی سەربازی لەناو نابرێن، چونكە زۆرینەی بنكە ئەتۆمییە هەستیارەكانی ئەو وڵاتە بە قوڵایی 800 مەتر لەژێر زەویدان.

وەزیری دەرەوەی ئێران دەڵێت، چەند وڵاتێكی ئەوروپا نزیكن لە ئەنجامدانی هەڵەیەكی ستراتیژی، بەرپرسیارن لە هەر رەوشێكی نەخوازراو كە ئاڵۆزی دروست بكات. 

عەباس عراقچی وەزیری دەرەوەی ئێران، لە تۆڕی كۆمەڵایەتی ئێكس سەبارەت بە هەڵوێستی هەریەك لە بەریتانیا، فەڕەنسا و ئەڵمانیا لە بەرانبەر دۆسیەی ئەتۆمی وڵاتەكەی رایگەیاندووە، ئەو وڵاتانە نزیكن لە ئەنجامدانی هەڵەیەكی ستراتیژی گەورە، بەرپرسیارێتی تەواویش لە هەر رەوشێكی نەخوازراو لە ئەستۆیاندایە كە ئاڵۆزی دروست بكات.

ئاماژەی بۆ ئەوەشكردوە، ئەو وڵاتانە لەبری ئەوەی بە نیاز پاكییەوە كارەكان بكەن، لە دەستەی بەڕێوەبەرانی ئاژانسی نێودەوڵەتی وزەی ئەتۆم رێبازێكی لایەنگرییان لە دژی ئێران گرتوەتەبەر.

وەزیری بەرگری عیراق پێشبینی دەكات لە مانگی ئەیلولدا چەند بنكەیەكی هێزەكانی هاوپەیمانان لە عیراقەوە بگوازرێنەوە بۆ هەرێم و جەختیشی كردەوە حكومەتی عیراق رێگە نادات لە هیچ لایەنێكەوە هێزەكانی هاوپەیمانان لە وڵاتەكە بەئامانج بگیرێن.

سابت عەباسی وەزیری بەرگری عیراق رایگەیاند، حكومەتی عیراق رێگە بە هیچ هەڕشەیەك نادات بۆ سەر هێزەكانی ئەمریكا لە عیراق كە لە چوارچێوەی هاوپەیمانی نێودەوڵەتیدا لە ئەركدان، چونكە مانەوەیان لە عیراق لە ئێستادا گرنگ و پێویستە.

وتیشی، تا ئێستا هیچ ئاگادارییەكیان سەبارەت بە گۆڕانكاری لە وادەی كشانەوەی هێزەكانی ئەمریكا لە عیراق پێنەگەیشتووە، پێشبینیش دەكرێت لە كۆتایی مانگی ئەیلولدا چەند بنكەیەكی هێزەكانی ئەمریكا لە عیراق چۆڵ بكرێن و بگوازرێنەوە بۆ هەرێم.

سەبارەت بە رەوشی سوریاش ئاماژەی بەوەكرد، بەو پێیەی هێشتا مەترسیەكانی كەمپی هۆل بۆ سەر عیراق بەردەوامە و شانە نوستوەكان و هەڕەشەكانی داعش لە ناوچەكە ماون، مانەوەی هێزەكانی ئەمریكا لە سوریا پێویستە.