حزبوڵای عیراق رایدەگەیەنێت، بەهیچ شێوەیەك لە ناوچەی جورف سەخر و دەوروبەری ناكشێنەوە و دەبێت سوپا بەسەر جەستەی چەكدارەكانیاندا بڕواتە شوێنەكە.

ئەبو تاڵیب سەعیدی، وتەبێژی حزبوڵا لە كۆنفرانسێكی رۆژنامەوانیدا رایگەیاند، ئەوان خاوەنی ئەو خاكەن و قوربانییان بۆ داوە.

جەختیشیكردەوە، سەردەمی خۆشاردنەوە كۆتایی هاتووە و هیچ لایەنێك لە ئێستا و داهاتوودا ناتوانێت ملیان پێ كەچ بكات یان شەرعییەتیان لێ بسەنێتەوە.

سوعەیدی هۆشداریشی لە هەر هەوڵێك بۆ چەكداماڵینیان و وتی، نەیارەكانیان دواجار بەرەو دوبەی، لەندەن و پاریس كۆچ دەكەن، بەڵام ئەوان هەر لەو خاكەدا دەمێننەوە و چۆڵی ناكەن.