دەزگای ئاسایشی هەرێم رایگەیاند، لە سێ چالاکیی جیادا، لە رێگەی بەڕێوەبەرایەتی نەهێشتنی مادە هۆشبەرەکان توانیویانە، شەش بازرگانی مادەی هۆشبەر لەسنوری پارێزگای سلێمانی دەستگیربکەن.

دەزگای ئاسایی هەرێم ئاماژەی بەوەکردوە،  چالاکی یەکە لەرۆژی 16ـی7ـی2026 لەدوای بەدواداچوون و ئەنجامدانی لێکۆڵینەوە توانرا، دەستبەسەر بڕی  سێ کیلۆ و پێنج سەد گرام مادەی هۆشبەر لەجۆری ماریوانا بگیرێت و کڕیار و فرۆشیاریش دەستگیربکەن.

لە چالاکی دوەمیشدا، کە رۆژی 25ـی7ـی2026 بوە، توانرا دەستبگیرێت بەسەر بڕی پێنج کیلۆ و سێ سەدگرام مادەی هۆشبەر لەجۆری تلیاک کە بەنیازبوون ڕەوانەی وڵاتانی ئەوروپای بکەن.

دەزگای ئاسایشی هەرێم لە جالاکی سێیەمیشدا، کە رۆژی 1ـی8ـی2026 بوە و توانیویانە، دەستبگرن بەسەر 149 هەزار 490 دەنک حەبی هۆشبەر، هەروەها 350 کەبەنیازی ناردنی بوون بۆ وڵاتێکی عەرەبی دراوسێ.

دەزگای ئاسایشی هەرێم ئاماژەی بەوەشکردوە، لەئێستادا تۆمەتباران بەمادەی 25 لەیاسای مادە هۆشبەرەکان و کارتێکارە ئەقڵییەکان راگیراون و لێکۆڵینەوە لەدۆسییەکانیان بەردەوامە.

لە نەخۆشخانەی ئافرەتان و لەدایکبوونی فێرکاریی هەولێر، ژنێک بە یەک سک چوار منداڵی بووە و تەندروستی هەر چواریشیان باشە.

نەخۆشخانەی ئافرەتان و لەدایکبوونی فێرکاری هەولێر بڵاویکردوەتەوە، ئەمڕۆ دووشەممە، دوای ئەوەی ژنێکی دوگیان سەردانی کردون و راستەوخۆ نەشتەرگەریی بۆ ئەنجامدرا و تێدا  بە سکێک چوار کۆرپەلە لەدایکبوون.   

نەخۆشخانەکە ئاماژەی بەوەکردوە، بەهۆی ئەوەی کۆرپەلەکان لە تەمەنی 29 هەفتەییدا لەدایکبوون و ناکام بوون، راستەوخۆ بۆ وەرگرتنی چاودێریی پزیشکیی پێویست گواسترانەوە بۆ بەشی چاودێریی وردی منداڵە ناکامەکان و چارەسەری پێویستیان پێدرا و دەرمانی (Surfactant)ـیان بۆ بەکارهێنرا.

نەخۆشخانەکە جەختیشیکردوەتەوە، دوای مانەوەیان بۆ ماوەیەکی پێویست لەژێر چاودێریدا، خۆشبەختانە هەر چوار کۆرپەلەکە بە تەندروستییەکی باشەوە گەڕێندرانەوە باوەشی دایکیان.

وەزیری نەوتی عیراق رایگەیاند، سەرەڕای ئەوەی لەگەڵ تاران لە گفتوگۆدان بۆ ئەوەی رێگە بەکەشتییە نەوتهەڵگرەکانیان بدات، بە ئاسانی و بەبێ کێشە گەروەکە تێپەڕێنن، پلانیشان هەیە بەشێک لە نەوتی کێڵگەكانی باشور لەرێگەی تورکیاوە هەناردە بکەن.

باسم محەمەد خەزیر، وەزیری نەوتی عیراق رایگەیاند، پلانێکی گەورەیان هەیە بۆ گواستنەوەی بەشێک لە نەوتی کێڵگەكانی باشور لە رێگەی بۆرییەکانی باکورەوە بە ئامانجی گەیشتن بە رێژەی هەناردەکردنی زیاتر لە 700 هەزار بەرمیل لە رۆژێکدا، ئەمەش وەک جێبەجێکردنی رێککەوتنی عیراق و تورکیا.

باسم محەمەد، ئاشکرای کردوە، لە ئێستادا، لەگەڵ تاران لە گفتوگۆدان تا ئاسانکاری بۆ کەشتییە نەوتهەڵگرەکانیان بکرێت، گەروەکە تێپەرینن و هیواشی خواستوە لە رۆژانی داهاتودا لێکتێگەیشتنی گەورە بەدەست بهێنن.

وەزیرەکەی عیراق، ئاماژەی بەوەش کرد، کە لە 1ی ئەم مانگەدا رێککەوتنێکی گرنگ لەگەڵ تورکیا ئیمزاکراوە بۆ درێژکردنەوەی لێکتێگەیشتنە نەوتییەکان بۆ ماوەی ساڵێک.

ناوبراو جەختیشیکردوەتەوە، حکومەت دەیەوێت پەیوەندییە ئابورییەکان و هاوبەشی لەگەڵ سەرجەم وڵاتانی دراوسێ بەهێز بکات بۆ پشتیوانیکردن لە ئابوریی نیشتمانی و خەرجکردنی داهاتەکان بۆ پەرەپێدانی ژێرخانی وڵات.