ئەندامێکی سەرکردایەتی یەکێتی دەڵێت: هەرێمی كوردستان بەشێك نییە لە گرژییەكانی ناوچەكە و سەرۆك بافڵ بەردەوام هەوڵی پاراستنی هەرێم دەدات.

لوقمان وەردی ئەندامی سەرکردایەتی یەکێتیی نیشتمانیی کوردستان لە میانی بەشداریکردنی لە بەرنامەی پانۆرامای کوردسات نیوز رایگەیاند، كوردستان یەكپارچەیە هەڕەشە بۆ سەر هەر شارێك هەڕەشەیە بۆ سەر هەمووان، هەروەها هەرێمی كوردستان بەشێك نییە لە گرژییەكانی ناوچەكە و سەرۆك بافڵ بەردەوام هەوڵی پاراستنی هەرێم دەدات لەو شەڕەی لەناوچەكەدا هەڵگیرساوە.

وتیشی، پاراستنی هەرێم لە ئەستۆی یەكێتی و پارتییە و كورد بەشێك نییە لە شەڕی ناوچەكە، بۆیە دەبێت لەپێناو پاراستنی هەرێم دەبێت لایەنەكان بەرپرسیارێتی لەئەستۆ بگرن.

سەبارەت بە رەوشی ناوخۆی هەرێم، ئەو ئەندامەی سەرکردایەتی یەکێتی ئاماژەی بەوەکرد، لە ساڵی 2021ـەوە کورد لە عیراقدا پاشەکشەی کردووە، ئەوەی ئێستاش لە هەرێم رودەدات ئەنجامی تێکچوونی باڵانسی هێز و دروستبوونی تاکرەوییە. رونیشیکردەوە، باشکردنی ئەم رەوشە تەنها بە راستکردنەوەی رێڕەوی حوکمڕانی و چەسپاندنی شەراکەتی راستەقینە دەبێت.

دەشڵێت، ستراتیژی یەکێتی پاراستنی قەوارەی هەرێمی کوردستانە و دژی هەر جۆرە دوو ئیدارەییەکن، ئەوەشی خستەڕوو، ئەوان جیاکاری لەنێوان شارەکاندا رەتدەکەنەوە و دەیانەوێت دامەزراوەکان تەنها بۆ خزمەتکردنی خەڵک بن، تەنانەت بابەتی باج و رسووماتیش لە هەرێم دەبێت بە یاسا رێکبخرێت نەک بە رێنمایی کە ببێتە بارگرانی.

لەبارەی پرسی پێکهێنانی حکومەتی نوێی هەرێمدا، لوقمان رایگەیاند، یەکێتی خاوەنی 39 کورسییە و پێشوازی لە هەر دەستپێشخەرییەک دەکات، هیچ کاتێکیش دەرگای گفتوگۆ داناخات، داواشیکرد, لایەنەکان سازش بۆ یەکدی بکەن، چونکە بە یەکڕیزی و تەبایی دەتوانرێت ئەم قۆناغە تێپەڕێنرێت.

سەبارەت بە داواکارییەکانی کاراکردنەوەی پەرلەمان، ئەو ئەندامەی سەرکردایەتی یەکێتی وتی، "پەرلەمانی کوردستانمان پەکنەخستووە تا کارای بکەینەوە، بەڵکو داواکاری بۆ کاراکردنەوەی پەرلەمان لە ئێستادا تەنها بۆ خۆدزینەوەیە لە پێکهێنانی حکومەت، چونکە ناکرێت پەرلەمان شەرعیەت بە حکومەتێکی کاربەڕێکەر بدات و پێویستە پێش هەر کۆبوونەوەیەک، رێککەوتنی سیاسی لەسەر دابەشكردنی پۆستەکان ئیمزا بکرێت."

"پاراستنی میللەت لەلای یەكێتی لە هەموو شتێك گەورەتر و پیرۆزترە، هەروەها داواكاری یەكێتی داواكاری كۆمەڵانی خەڵكی كوردستانە" لوقمان وەردی وا دەڵێت.

لە سنوری شاری سلێمانی دەستبەسەر 25 هەزار دەنک حەبی هۆشبەر و 21 کیلۆگرام مادەی هۆشبەر لەجۆری ئەمفیتامین 'کریستاڵ"ـدا گیرا، دەزگای ئاسایشی هەرێمیش دەڵێت: چوار بازرگانی مادەی هۆشبەر دەستگیرکراون.

دەزگای ئاسایشی هەرێم رایگەیاند، بەڕێوەبەرایەتی ئاسایشی گشتی سلێمانی لەدوو چالاکییدا، توانیان دەستبەسەربڕی 25 بیست و پێنج هەزار دەنک حەبی هۆشبەر و 21 کیلۆگرام مادەی هۆشبەر لەجۆری ئەمفیتامین 'کریستاڵ'ـدا بگرن لەسنوری شاری سلێمانی.

ئاماژەی بەوەشکرد، لە چالاکی یەکەمدا لە رۆژی 18-7-2026، لەدوای بەدواداچوون و ئەنجامدانی لێکۆڵینەوەی ورد، دوو بازرگانی مادەی هۆشبەر لەشاری سلێمانی دەستگیرکران و دەستبەسەربڕی 25بیست و پێنج هەزار دەنک حەبی هۆشبەرگیرا کە بەشێوەی قاچاغ بەمەبەستی ساغکردنەوەی هێنرابووە شاری سلێمانی.

دەزگای ئاسایشی هەرێم ئەوەشی خستەڕوو، لە چالاکی دووەمدا لە رۆژی 19-7-2026، بەڕێوەبەرایەتی ئاسایشی گشتی سلێمانی بەهەماهەنگی بەڕێوەبەرایەتی ئاسایشی رۆژئاوای سلێمانی لەدوای بەدواداچوون و ئەنجامدانی لێکۆڵینەوەی ورد توانیان دوو بازرگانی مادەی هۆشبەر دەستگیربکەن و دەستبەسەربڕی 21 کیلۆگرام مادەی هۆشبەر لەجۆری ئەمفیتامین(کریستاڵ)ی وشک و شل بگرن.

راشیگەیاند، لەئێستادا تۆمەتباران بەمادەی 25  لەیاسای مادەهۆشبەرەکان و کارتێکارە ئەقڵییەکان ژمارە 1ـی ساڵی 2020 راگیراون و لێکۆڵینەوە لەدۆسییەکانیان بەردەوامە.

ترەمپ فەرمانی بەهێز بە سوپای وڵاتەکەی دەدات و دەڵێت؛ هەر کاتێک ئێران سەربازێکی ئەمریکی بکوژێت، چەند هێندە باجەکەی دەداتەوە.

دۆناڵد ترەمپ، سەرۆکی ئەمریکا لە پەیامێکی نوێددا لە هەژماری رەسمی خۆی لە سۆشیاڵ تروس، هۆشدارییەکی راستەوخۆ ئاراستەی تاران دەکات و رایدەگەیەنێت کە فەرمانی سەربازیی نوێی بۆ وەڵامدانەوەی ئێران دەرکردووە.

ئاماژەی بەوەشکرد، هەر کاتێک ئێران سەربازێکی ئەمریکی بکوژێت، چەندین هێندە باجی ئەو کوشتنە دەداتەوە.

سەرۆکی ئەمریکا ئاشکرایکرد، فەرمانی راستەوخۆی بە لێپرسراوانی باڵای سەربازی و پنتاگۆن داوە و وتی: ئەم رێنمایی و فەرمانە گوزراوەتەوە بۆ پیت هێگسێس، وەزیری جەنگ، دانیاڵ کەین، سەرۆکی ئەرکانی هاوبەشی سوپا، و سەرجەم فەرماندەکانی دیکەی ناو سوپا.