کەناڵی 13ـی ئیسرائیلی لە زاری لێپرسراوانی  باڵای وڵاتەکەیەوە رایگەیاند، ئەمریکا خۆی بۆ فراوانکردنی ئۆپراسیۆنە سەربازییەکانی دژی ئێران ئامادە دەکات و لە چوارچێوەیەدا 100 فرۆکەی سوتەمەنی بۆ ناوچيکە گواستوەتەوە.

کەناڵەکە بە پشتبەستن بە سەرچاوە ئیسرائیلییەکان، رایگەیاندوە، هەفتەی داهاتوو بۆ ناوچەکە هەفتەیەکی چارەنوسساز دەبێت.

 لە راپۆرتی کەناڵە ئیسرائیلییەکەدا هاتووە؛ ناوخۆی ئیسرائیلدا وا دەخەمڵێندرێت کە دوای هەفتەیەک لە هێرشە بەردەوامەکانی ئەمریکا بۆ سەر خاکی ئێران، دۆناڵد ترەمپ، سەرۆکی ئەمریکا، نیازی هەیە مەودا و قەبارەی ئۆپراسیۆنە سەربازییەکانی زیاتر پەرە پێبدات.

هاوکات لێپرسراوێکی  باڵای سوپای ئیسرائیل بە کەناڵەکەی راگەیاندووە؛ ئێرانییەکان هەوڵێکی زۆر دەدەن بۆ ئەوەی ئیسرائیل پەلکێشی ناو ئەم ململانێیە نەکەن، بەڵام ئەگەر ئەمریکییەکان هێرشەکانیان چڕتر بکەنەوە، لەوانەیە ئەم رەوشە گۆڕانکاری بەسەردا بێت.

 لە لایەکی ترەوە  باڵیۆزخانەی ئەمریکا لە ئیسرائیل داوای لە هاووڵاتیانی خۆی کردووە، کە بەهۆی ئەگەری پەرەسەندنی چاوەڕواننەکراوی گرژییەکان، پێداچوونەوە بە گەشتەکانیاندا بکەن بۆ رۆژهەڵاتی ناوەڕاست، بەتایبەتی بۆ ئیسرائیل.

کەناڵی 13ـی ئیسرائیل ئاماژەی بەوەش کردووە، هەوڵە نێوەندگیرییەکانی قەتەر بۆ کەمکردنەوەی گرژییەکان هێشتا بەردەوامن، بەڵام سەرچاوە سیاسییەکانی ئیسرائیل پێیان وایە، کە ئەم هەوڵانە لە کورتماوەدا هیچ کاریگەرییەکیان لەسەر بڕیارەکانی دۆناڵد ترەمپ نابێت.

بەڕێوەبەرایەتی پۆلیسی سلێمانی رایگەیاند، مەفرەزەکانی بنکەی پۆلیسی راپەڕینی بەڕێوەبەرایەتیان تۆمەتبارێکیان دەستگیرکردوە، کە بەفێڵ لەتۆڕی کۆمەڵایەتی سناپ چات17 هەزار دۆلاری  لە هاووڵاتیەک وەرگرتبوو.

پۆلیسی سلێمانی لە راگەیەندراوێکدا ئاماژەی بەوەکردوە بەتۆمەتی فێڵکردن و وەرگرتنی پارە لەتۆڕەکۆمەڵایەتییەکان تۆمەتبارێک دەستگیرکراوە، کە لەتۆڕی کۆمەڵایەتی سناپ چات بەئاکاوەنتی ساختە و بەناوی ئافرەت و بە بەکارهێنانی زیرەکی دەستکرد و گۆڕینی دەنگ، لە رێگەی پەیوەندی خۆشەویستی ساختەوە (17هەزار دۆلار)ی لە هاووڵاتیەک سەندوە.

ئەوەشخراوەتە روو، ئەو هاووڵاتییە هەڵخەڵيتێندراوە، سکاڵای تۆمار کردوە و دوای وەرگرتنی بڕیاری دادوەر، دەستبەجێ لێکۆڵینەوەکان بۆ دۆزینەوەو دەستگیرکردنی تۆمەتبار دەستیپێکردوە و سەرەنجام توانرا تۆمەتبار بدۆزرێتەوەو لەلایەن مەفرەزەکانی بنکەی پۆلیسی راپەڕینەوە دەستگیربکرێت.

پۆلسیس سلێمانی دەڵێت؛ لە ئێستادا، تۆمەتبار دانی بەتاوانەکەیدا ناوە و بەبڕیاری  دادوەر و بەپێی ماددەی (2) لەیاسای خراپ بەکارهێنانی ئامێرەکانی پەیوەندیکردن بەدەلالەتی ماددەی (456) لەیاسای سزادان راگیراوەو لێکۆڵینەوەکان بەردەوامن.

فەرماندەیی ناوەندیی ئەمریکا (سێنتکۆم) رایگەیاند، لە هێرشەکانی دوێنێ ئێراندا بۆسەر پێگەکانیان لە ئوردن دوو سەربازیان کوژراون و سەربازێکیشیان چارەنوسی نادیارە، چوار سەربازیشیان بریندارن و چارەسەر وەردەگرن.

لە راگەیەندراوەکەی سێنتکۆمدا هاتووە؛  کاتێک هێزەکانیان بەرپەرچی هێرشە موشەکییە بالیستی و  درۆنەکانی ئێرانیان داوەتەوە، حەوت سەربازیان بوون بە قوربانی، کە تا ئێستا چارەنوسی یەکیان نادیارە.

سێنتکۆم ئاماژەی بەوەشکردوە، بریندارەکان برینیان سوکە و وەک رێزێک لە بنەماڵەکانیان، ناوی کوژرا و بریندارەکان تا 24 سەعات بڵاوناکاتەوە .