فەرمانگەی راگەیاندنی ئەنجومەنی نوێنەرانی عێراق خشتەی کاری کۆبوونەوەی ئەنجومەنەکەی بڵاوکردەوە، سێ بڕگەیان تایبەتە بە دەنگدان لەسەر پڕۆژەیاسای مافی مرۆڤ و رێککەوتنی عێراق و تونس و رێککەوتنی دەریایی نێوان عێراق و میسر. 

بەپێی کارنامەکە، بڕگەی چوارەم تایبەتە بە لێپرسینەوە لە سەرۆکی تۆڕی راگەیاندنی عێراقی.

لە بڕگەکانی پێنجەم تا یانزەیەم، خوێندنەوەی یەکەم بۆ پڕۆژەیاسای ھەڵوەشاندنەوەی بڕیارەکانی ئەنجومەنی شۆڕشی ھەڵوەشاوە و خوێندنەوەی دووەم بۆ ھەمواری یاسای ماددە ھۆشبەرەکان و ھەمواری یاسای دەستەی دەریایی ساڵی ٢٠١٨ دەکرێت.

لە نۆی ئەم مانگەدا، کۆبوونەوەی تایبەت بە ھەڵبژاردنی سەرۆکی ئەنجومەنی نوێنەران بەڕێوەچوو، بەڵام کاندیدەکان دەنگی پێویستیان نەھێنا و سکاڵای یاسای لەسەر یەکێک لە کاندیدەکان تۆمارکرا بە تۆمەتی پەیوەندی بە رژێمی بەعسەوە.