رۆژی 8ـی 11، کامێراکانی خاڵ بۆ خاڵ لە رێگای دەربەندیخان – کەلار دەکەونەکار و بەڕێوەبەرایەتیی هاتوچۆی گەرمیانیش داوایەک لە شۆفێران دەکات.

بەڕێوەبەرایەتیی هاتوچۆی گەرمیان رایگەیاندووە: کامێراکانی خاڵ بۆ خاڵ لە نێوان قەزای کەلار بۆ قەزای دەربەندیخان لە سەعات 10ـی سەرلەبەیانی رۆژی یەکشەممە 8ـی 11ـی 2026، دەکەونەکار و سەرپێچی تۆماردەکەن.

هاتوچۆی گەرمیان دەشڵێت، تکایە بۆ ئەومەبەستە ئاگاداربن، پابەندی خێرای دیاریکراوبن، تاکو بەدوربن لەسزای مادی و روداوی نەخوازراو.

وەزیری دارایی عیراق ئیمزای لەسەر تەمویلکردنی موچەی مانگی 10ـی موچەخۆرانی هەرێم کردووە و نووسراوەکە ئاڕاستەی بەشی ژمێریاری وەزارەتی دارایی کراوە.

بێستون سەلام، پەیامنێری کوردسات نیوز رایگەیاند: فالح ساری، وەزیریی دارایی عیراق فەرمانیداوە بە تەمویلکردنی موچەی مانگی 10ـی موچەخۆرانی هەرێم و نووسراوەکە ئاڕاستەی بەشی ژمێریاری وەزارەتی دارایی عیراق کراوە.

بەپێی زانیارییەکانی پەیامنێری کوردسات نیوز، رێکارەکان لە بەشی ژمێریاری جێبەجێ دەکرێن و دواتر موچەی هەرێم دەخرێرتە سەر هەژماری وەزارەتیی دارایی هەرێم.

وتەبێژی وەزارەتی دەرەوەی ئێران رایدەگەیەنێت، هێورکردنەوە و ئاساییکردنەوەی رەوشی گەروی هورمز بەندە بە کۆتاییهاتن بە گەمارۆکان و تۆمەتەکانی دژایەتیکردنی جووەکانیشی رەتکردەوە و بە دیاردەیەکی ئەوروپایی ناوی دەبات.

ئیسماعیل بەقائی، وتەبێژی وەزارەتی دەرەوەی ئێران رایگەیاند؛ لە سەرووی هەموو پرسەکانەوە پێویستە ئاسایش و سەقامگیری بۆ گەروی هورمز بگەڕێندرێتەوە، بەڵام تا ئەو کاتەی گەمارۆکان لەسەر ئێران بەردەوام بن، هیچ گۆڕانکارییەک لە رەوشی گەرووەکەدا روونادات.

لە بەشێکی دیکەی لێدوانەکانیدا سەبارەت بە تۆمەتەکانی پەیوەست بە دژە جوویی، بەقائی ئاماژەی بەوە کرد، دیاردەی دژە جوویی دیاردەیەکی ئەوروپاییە و هیچ پەیوەندییەکی بە ئێرانەوە نییە، چونکە تاران پەیوەندییەکی مێژوویی و دێرینی لەگەڵ جووەکاندا هەیە و سەرجەم شوێنە پیرۆزەکانی یەهود لە ئێران پارێزراون و رێزیان لێدەگیرێت.

وتەبێژی وەزارەتی دەرەوەی ئێران جەختیشی کردەوە، ئەو رووداو و پشێوییانەی لە ئەوروپا دەگوزەرێن، بە هیچ شێوەیەک پەیوەندییان بە وڵاتەکەیەوە نییە.