وەزیری دەرەوەی ئێران دەڵێت، لە گفتوگۆکانیان بەرەوپێشچوونی هەبووە بەڵام گەیشتن بە رێککەوتنی کۆتایی بەندە بە وەڵامی ئەرێنیی ئەمریکا.

عەباس عراقچی، وەزیری دەرەوەی ئێران رایگەیاند، دیپلۆماسی و دیالۆگ لە رێگەی نێوەندگیری قەتەرەوە بەردەوامە بۆ کەمکردنەوەی ئاڵۆزییەکان، هیواشی خواست لایەنی ئەمریکی دروست مامەڵە بکات و وەڵامی ئەرێنییان بداتەوە تا بگەنە رێککەوتنێک.

لەلایەکی دیکەوە، ئاژانسی رۆیتەرز لە سەرچاوەیەکی ئاگادارەوە بڵاویکردەوە، وەفدی دانوستانکاری ئێران بۆ سێیەم رۆژی لەسەریەک لە دەوحەن و راستەوخۆ لەگەڵ نێوەندگیری قەتەری واشنتۆن لە سەرخەتن بۆ بەدەستهێنانی رێککەوتنێک کە کۆتایی بە رووبەڕووبوونەوە سەربازییەکان بهێنێت.

ئەم دانوستانانە لە کاتێکدا بەڕێوەدەچن کە ترسی دەستثێکردنەوەی خولێکی نوێی شەڕ لەئارادایە، بەتایبەت لەگەڵ نزیکبوونەوەی هەڵبژاردنەکانی نیوەی کۆنگرێسی ئەمریکا، لەو چوارچێوەیەدا، دۆناڵد ترەمپ سەرۆکی ئەمریکا رایگەیاندووە گفتوگۆکان بە باشی بەڕێوەدەچن بەڵام بژارەی سەربازی هێشتا لەسەر مێزە؛ لە بەرانبەردا موجتەبا خامنەیی رابەری ئێران فەرمانی بە هێزە چەکدارەکانی وڵاتەکەی داوە لە ئامادەباشی تەواودا بن و تاران هەڕەشەی کردووە هەر هێرشێک بکرێتە سەریان، بەبێ ڕەچاوکردنی سنوری جوگرافی وەڵامی توند دەدەنەوە.

وەزارەتی سامانە سروشتییەکانی هەرێم ئاشکرایکرد، سەرۆک وەزیرانی عیراق رەزامەندی لەسەر ناردنی 50 ملیۆن لیتر نەوتی سپی بۆ هەرێم دەربڕیوە، کە بە نرخی 250 دینار بۆ هەر لیترێک دابەش دەکرێت.

وەزارەتی سامانە سروشتییەکانی حکومەتی هەرێمی کوردستان رایگەیاند، دوای هەوڵە بەردەوامەکانیان، سەرۆک وەزیرانی فیدراڵ رەزامەندی لەسەر دابینکردنی 50 ملیۆن لیتر نەوتی سپی بۆ هەرێمی کوردستان دەربڕیوە.

بەپێی راگەیەندراوێکی وەزارەتی سامانە سروشتییەکان، ئەو بڕەی تەرخانکراوە تەنیا ٪18ـی پێداویستیی راستەقینەی هەرێم دابین دەکات، بەوپێیەی هەرێمی کوردستان پێویستی بە زیاتر لە 268 ملیۆن و 710 هەزار لیتر نەوت هەیە تا بتوانرێت بۆ هەر خێزانێک 200 لیتر دابەش بکرێت.

ئاماژەی بەوەشکردووە، راستەوخۆ دوای گەیشتنی بەشەنەوتەکە، لە رێگەی بەڕێوەبەرایەتییەکانی نەوت و کانزای پارێزگا و ئیدارە سەربەخۆکانەوە و بە هەمان نرخی پاڵپشتیکراوی حکومەتی فیدراڵ (250 دینار بۆ هەر لیترێک)، دەست بە دابەشکردنی دەکرێت.

لە کۆتایی راگەیەندراوەکەدا جەختکراوەتەوە کە وەزارەتی سامانە سروشتییەکان لەسەر هێڵ دەبێت لەگەڵ وەزارەتی نەوتی عیراق، بە مەبەستی خێراکردنی پرۆسەی گواستنەوەی نەوتەکە و زیادکردنی پشکەکە تا لەگەڵ پێداویستیی تەواوی خێزانەکانی هەرێمدا بگونجێت.

سەرۆكی ئاژانسی پاراستن و زانیاری / زانیاری دەڵێت؛ ئاسایشی ناوچەكەو جیهان ئەركێكی هاوبەشە، بۆیە هیچ وڵاتێك بە تەنیا ناتوانێت لەرێی سەپاندنی ستراتیژی خۆیەوە، ئاسایشی خۆی و هیچ ناوچەیەك لە جیهاندا بپارێزێت .

جەلال شێخ ناجی، سەرۆكی ئاژانسی پاراستن و زانیاری / زانیاری، لەپەراوێزی بەشداری لە دیالۆگی مەنامە (IISS Manama Dialogue) كە لە بەحرەین بەڕێوەدەچێت، لە سێهەمین رۆژی دیالۆگەكەدا، چەندین دیدارو كۆبوونەوەی لەسەر ئاستی باڵای هەواڵگری و ئەمنی ئەنجامدا.

سەرۆكی ئاژانسی پاراستن و زانیاری / زانیاری، لە پانێڵێكدا لە بارەی رێگاكانی چەسپاندنی ئاسایش و سەقامگیری لە خۆرهەڵاتی ناوەڕاست، هەڵوەستەیكرد لەسەر پەرەسەندنە ئەمنی و سەربازییەكانی ناوچەكە و تێڕوانینی خۆی سەبارەت بە پێویستی یەكخستنی هەوڵە هاوبەشەكان بۆ چەسپاندنی بەهاكانی پێكەوەیی و هاریكاری هاوبەش بە ئاڕاستەی پاراستنی سەقامگیری خستەڕوو و رایگەیاند، بەبێ لێكتێگەیشتن و دیالۆگی بەرپرسیارانە، ناتوانین ئاسایش و ئارامی لەناوچەكەدا بەقەرار بكەین، ئەم هەلومەرجەش كە هاتۆتە پێش، ئەرك و بەرپرسیارێتی هەموولایەك زیاتر دەكات كە پێكەوە كاربكەین لەپێناو ئاسایشی خۆڕهەڵاتی ناوەڕاستدا.

سەرۆكی ئاژانسی پاراستن و زانیاری / زانیاری، ئەوەشی خستەڕوو، ئاسایشی ناوچەكەو جیهان ئەركێكی هاوبەشە، روداو و تەنگژەكانی ئەم دواییەش دەریخست، هیچ وڵاتێك بە تەنیا ناتوانێت لەرێی سەپاندنی ستراتیژی خۆیەوە، ئاسایشی وڵاتی خۆی یان هیچ ناوچەیەك لە جیهاندا بپارێزێت بۆیە بەهەماهەنگی دەتوانین بە ئاسانی زاڵببین بەسەر ئاڵنگارییەكاندا و نەهێڵین لە هیچ رەوشێکدا ئاسایشی وڵاتەكانمان بكەوێتە مەترسییەوە.

جەلال شێخ ناجی راشیگەیاند، پەیوەندییە هەواڵگریی و ئەمنییەكانمان لەبەرژەوەندی هەرێم و عیراق وسەقامگیری وڵاتەكەمان خستوەتە كار و نەمان هێشتووە خاكەكەمان دژی هیچ لایەنێك بەكاربهێنرێت ، بەڵكو كاردەكەین تا پێكەوە ئارامی ناوچەكە و ئاسایشی نیشتمانیمان بپارێزین و بەكەمترین زیان بەرۆكگیرییەكانی ئەم قۆناغە تێپەڕێنین.