جومانە غەلای، وتەبێژی کۆمسیۆنی باڵای سەربەخۆی هەڵبژاردنەکان، رایگەیاند کە پرۆسەی چاپکردنی کارتی دەنگدان بۆ هەڵبژاردنەکان گەیشتووەتە رێژەی 50٪ و لە وڵاتی ئیمارات بەڕێوەدەچێت. ناوبراو جەختی کردەوە کە کارتەکان بەپێی ستانداردی ئەمنیی زۆر توند چاپ دەکرێن بۆ پاراستنی دەنگی دەنگدەران.

بەپێی راگەیەندراوەکە، کۆی گشتیی ژمارەی کارتی دەنگدان بۆ دەنگدەرانی گشتی 22,046,200 کارتە و بۆ دەنگدانی تایبەتیش 1,509,300 کارتە. هەروەها کارتی یەدەگیش چاپکراوە بۆ روبەروبوونەوەی هەر پێشهاتێک.

وتەبێژی کۆمسیۆنی هەڵبژاردنەکان ئاماژەی بەوەدا کە کارتەکان چەندین تایبەتمەندیی ئەمنیان هەیە، لەوانە:

• نیشانەی شاراوە.

• جۆرە مەرەکەبێکی تایبەت کە تەنها بە ئامێر و تاقیکردنەوەی تایبەت دەدۆزرێتەوە.

• تایبەتمەندیی دژە-کۆپیکردن.

• جۆرە کاغەزێکی تایبەت کە هاوشێوەی پارەی نەختینە نیشانەی ئاوی و نهێنیی تێدایە بۆ دڵنیابوون لە پاراستنی پرۆسەکە.

وتەبێژی کۆمسیۆن دووپاتیکردەوە کە ئەم رێوشوێنە توندانە بۆ دڵنیابوونە لە سەلامەتی و پاک و بێگەردیی پرۆسەی دەنگدان.

 

مەسعود پزیشکیان، سەرۆکی ئێران، ئەمڕۆ شەممە رایگەیاند کە "رۆژئاوا ناتوانێت" تاران رابگرێت، جەختیشی لەوە کردەوە کە وڵاتەکەی "هەرگیز خۆی بەدەستەوە نادات".

ئاژانسی "تەسنیم" لە زاری پزیشکیانەوە بڵاوی کردووەتەوە کە لە میانی رێوڕەسمی رێزلێنان لە هەڵگرانی میدالیای ئۆڵۆمپیادە زانستییە جیهانییەکان وتوویەتی: "هێرشە سەربازییەکان ناتوانن رێگەمان لێ بگرن لە دووبارە بنیاتنانەوەی پڕۆگرامە ئەتۆمییەکەمان."

هەروەها وەڵامی هەوڵەکانی رۆژاوای دایەوە بۆ چالاککردنەوەی میکانیزمی "سزاکردنەوە" (snapback)، و وتی: "رۆژئاوا ناتوانێت رامانگرێت؛ لە نەتەنزیان دا، بەڵام بێئاگان لەوەی کە دەست و مرۆڤەکانن نەتەنز و گرنگتر لە نەتەنزیش دروست دەکەن، و بەردەوام دەبن لە دروستکردنی."

سەرۆکی ئێران درێژەی بە قسەکانیدا: "تەنها باوەڕمان بە توانای خۆمان بەسە بۆ تێپەڕاندنی ئاستەنگەکان، و ئەوانەی نیازی خراپیان بۆ ئەم وڵاتە هەیە ناتوانن رێگامان لێ بگرن."

پزیشکیان دووپاتی کردەوە: "بە هیچ شێوەیەک ناتوانین رێگری لە کەسێک بکەین کە خاوەنی ئارامگرتن، ویست و توانای پێشکەوتن بێت. هەرگیز خۆمان بەدەستەوە نادەین بۆ سەرپێچییەکان و چۆک دانانایەین، چونکە توانای گۆڕانکاریمان هەیە."

فەرماندەی سێنتکۆم لە یەکەم سەردانیدا بۆ رۆژهەڵاتی ناوەڕاست لەگەڵ سەرۆکی ئەرکانی سوپای یەمەن کۆبووەوە.

ئەدمیرال براد کوپەر، فەرماندەی فەرماندەیی ناوەندیی ئەمریکا (سێنتکۆم)، لە یەکەم سەردانیدا بۆ رۆژهەڵاتی ناوەڕاست وەک فەرماندەی سێنتکۆم، لەگەڵ لیوا روکن سەغیر حەمود بن عەزیز، سەرۆکی ئەرکانی گشتیی هێزە چەکدارەکانی یەمەن، کۆبووەوە. ئەم کۆبوونەوەیە لە 15ی ئەیلولدا، لە کاتی سەردانەکەی کوپەر بۆ شانشینی عەرەبستانی سعوودی، بەڕێوەچوو و تیایدا هەوڵەکانی بەهێزکردنی هاوکاریی ئەمنی تاوتوێ کرا.

ئەدمیرال کوپەر رایگەیاند: "هێزە چەکدارەکانی یەمەن هاوبەشێکی بەنرخن." وتیشی: "ئەوان هاوبەشمانن بۆ پەرەپێدانی ئاشتی، سەقامگیری و ئاسایش لە سەرانسەری ناوچەکەدا." ئەم کۆبوونەوەیە لە کاتێکدایە کە ناوچەکە گرژییەکی زۆری بەخۆیەوە بینیوە و هەوڵەکانی چڕکردنەوەی هاوکاریی ئەمنی وڵاتانی ناوچەکە و ئەمریکا گرنگییەکی تایبەتی هەیە.