رێكخراوی تەندروستی جیهانی رایگەیاند، ساڵی 2024، 282 ملیۆن كەس لە جیهاندا توشی مەلاریا بوون و 610 هەزار كەسیش بەهۆی نەخۆشییەكەوە گیانیان لەدەستداوە.

رێكخراوی تەندروستی جیهانی لە رۆژی جیهانی مەلاریادا رایگەیاند، ساڵی 2024، 282 ملیۆن كەس لە سەرانسەری جیهان توشی مەلاریا بوون، كە كیشوەری ئەفریقا بە پلەی یەكەم دێت لە رووی توشبوانی ئەو نەخۆشیەوە. 

بەپێی ئامارەكەی تەندروستی جیهانی، لە ساڵی 2024دا لە كۆی ئەو 282 ملیۆن توشبووەی مەلاریا 265 ملیۆن توشبوویان تەنها لە ئەفریقا بوون كە دەكاتە كۆی 95٪ی توشبووانی جیهان. هاوكات، لەكۆی 610 هەزار گیانلەدەستدان 579 هەزاریان لە ئەفریقا بوون و 75٪ی گیانلەدەستدانەكانیش منداڵانی خوار تەمەن پێنج ساڵ بوون.

مەلاریا نەخۆشییەكی گوازراوەیە و لەرێگەی پێوەدانی مێشولە دەگوازرێتەوە، نەخۆشییەكە نیشانەكانی هاوشێوەی پەتای توند یان كۆرۆنان و توانای چارەسەركردنی هەیە.

 

ئەوقافی هەرێم رایگەیاند، بە مەبەستی خزمەتکردنی حاجیانی هەرێم، توانیویانە بە هەماهەنگی لەگەڵ عیراقدا گەشتی ئاسمانی بۆ حاجیان دابین بکەن

وەزارەتی ئەوقاف و کاروباری ئایینی هەرێم راگەیەندراوێکی بڵاوکردەوە  و تێیدا هاتووە؛ دوای هەوڵەکانی حکومەتی هەرێم بۆ زیاتر خزمەتکردنی حاجیان، لەڕێگەی بەڕێوەبەرایەتی گشتی حەج و عومرە، بەهەماهەنگی حەج و عومرەی عیراق، بڕیاردار بە دابینکردنی فڕۆکە  و لە سێ رۆژدا  تەواوی حاجیان گەشتدەکەن بۆ سعودییە.

وەزارەتی ئەوقاف ئاماژەی بەوەکردوە، حاجیانی کوردستان تا سنوری عەرعەر بەپاس دەچن و لەوێشەوە بۆ فرۆکەخانەی جەدە لە وڵاتی عەرەبستانی سعودیە بە فڕۆکە گەشت دەکەن.

ئەوەشخراوەتەڕوو، ئەم بڕیارە لەپێناو خزمەتکردنی زیاتری حاجیانی کوردستان و گەیاندنیانە بەسەلامەتترین رێگا بۆ مەککەی پیرۆز.

ئەوقافی هەرێم دەشڵێت؛ لە کوردستانەوە حاجیان جانتاکانیان بەڕێگەی بارهەڵگر دەبرێتە شاری مەککەی پیرۆز و رەنگە پێش گەیشتنی خۆشیان جانتاکانیان بگات بە هۆتێل، ئەمەش بۆئەوەیە حاجیان بەوپەڕی ئاسوودەیی گەشتەکەیان ئەنجام بدەن.

وەک لە راگەیەندراوەکەدا هاتووە؛ بڕیارە رۆژی 12ی ئایار یەکەم گەشت بەفرۆکە دەستپێبکات، بەپێی خشتەیەکی رۆژانە لەماوەی سێ رۆژ تەواوی حاجیان گەشت دەکەن بۆ وڵاتی سعودیە.