بڕیارە ئەمڕۆ ئەنجومەنی دەوڵەتی لەبارەی ناكۆكییەكانی نێوان هەرێم و بەغداد لەبارەی داهاتە نانەوتییەكان كۆببێتەوە و چاوەڕوان دەكرێت لەرێگای پێشنیازەكانییەوە كۆتایی بەو ناكۆكییانە بهێنێت.

پەیامنێری كوردسات نیوز لە بەغداد رایگەیاند، چاوەڕوان دەكرێت ئەو پێشنیازەی ئەنجومەنی دەوڵەت دەیكات پاڵپشت بە یاسا و دەستور، كۆتایی بە ناكۆكییە سیاسییەكانی نێوان هەرێم و بەغداد بهێنێت و گرفتەكانی نێوانیان یەكلا بكاتەوە.

ئەنجومەنی دەوڵەتی عیراق باڵاترین دەسەڵاتی راوێژكاری دەوڵەتە و لەبارەی گرفتە یاسایی و دەستوری و كارگێڕییەكانەوە هەر پێشنیازێك بكات، لایەنەكان ناچار دەكات پێوەی پابەند ببن، بۆ پرسی ناكۆكییەكانی نێوان هەرێم و عیراقیش، ئەنجومەنەكە چارەسەری گرفتەكان لەرێگای یاسا و دەستورەوە روندەكاتەوە و لەوبارەیەوە پەیامنێری كوردسات نیوز ئاماژەی بەوەكرد، ئەنجومەنی دەوڵەت تاوەكو سبەینێ دووشەممە بە رەسمی وەڵامی ئەنجومەنی وەزیرانی عیراق دەداتەوە، بۆ ئەوەی لە كۆبوونەوەی ئەم هەفتەیەی ئەنجومەنی وەزیراندا لە رۆژی سێ شەممە تاوتوێ بكرێت.

 

بەپێی پێشبینییەکانی کەشناسی لە 48 کاتژمێری داهاتوودا ئاسمان ساماڵ دەبێت و لەهەندێک ناوچە پلەکانی گەرما نزمتر دەبنەوە.

بەڕێوەبەرایەتی گشتی کەشناسی هەرێم بڵاویکردەوە، ئەمڕۆ یەکشەممە ئاسمان ساماڵ و لە ناوچەکانی باکور ساماڵ و پەڵە هەور دەبێت، هاوکات پلەکانی گەرما نزیک دەبێتەوە لە تۆمارکراوەکانی دوێنی.

ئاماژەی بەوەشکرد، سبەینێ دووشەممە پلەکانی گەرما نزیک دەبێتەوە لە تۆمارکراوەکانی ئەمڕۆ جگە لە ناوچەکانى رۆژهەڵات کەمێک نزمتر دەبنەوە.

بەرزترین پلەکانی گەرمای پێشبینیکراو بە پلەی سیلیزی

هەولێر : 36 پلەی سیلیزی

سلێمانی : 34 پلەی سیلیزی

دهۆک : 37 پلەی سیلیزی

کەرکوک : 39 پلەی سیلیزی

زاخۆ : 37 پلەی سیلیزی

هەڵەبجە : 34 پلەی سیلیزی

سۆران : 35 پلەی سیلیزی

حاجی ئۆمەران : 25 پلەی سیلیزی

گەرمیان : 40 پلەی سیلیزی

خوشکی کیم جۆنگ ئون هۆشداری دەداتە ئەمریکا و کۆریای باشور و ژاپۆن، کە ئەنجامدانی مانۆڕی سەربازی هاوبەشی ئەو سێ وڵاتە کاریگەری خراپی لێدەکەوێتەوە.

میدیاکانی کۆریای باکور بڵاویانکردەوە، کیم یۆ جۆنگ راوێژکاری سەرۆکی کۆریای باکور و خوشکی کیم جۆنگ ئون هۆشداریداوە لە مانۆڕی سەربازی هاوبەشی ئەمریکا و ژاپۆن و کۆریای باشور و دەڵێت: ئەو مانۆڕە سەربازییە کاردانەوەی نەرێنی لێدەکەوێتەوە.

ئەمە لەکاتێکدایە سوپای کۆریای باکور ئاشکرایکردووە، وڵاتەکەی و ئەمریکا و ژاپۆن، ساڵانە مەشقی سەربازی هاوبەش بە ناوی "لێواری ئازادی" ئەنجامدەدەن، کە لە 15ـی ئەیلولەوە دەستپێدەکات بۆ بەرزکردنەوەی تواناکانی ئۆپراسیۆنی ئاسمانی و دەریایی و ئەلکترۆنی لەبەرانبەر هەڕەشە ئەتۆمی و موشەکییەکانی کۆریای باکور.

ئاژانسی هەواڵی ناوەندی کۆریای باکور لەزاری کیمەوە رایگەیاندووە، ئەنجامدانی ئەو مانۆڕە سەربازییە ئەوەیان بیردەخاتەوە کە نیشاندانی بێباکی هێزە لەلایەن ئەو سێ وڵاتەوە لە ناوچەیەکی هەڵە، کە بێ گومان کاردانەوەی نەرێنی دەبێت.

هاوکات میدیاکانی کۆریای باشور بڵاویانکردەوە، سیئۆل و واشنتۆنیش پلانیان هەیە لەم هەفتەیەدا مەشقی ئایرۆن مایس ئەنجام بدەن، ئەمەش ھاوشێوەکردنی توانا ئاسایی و ئەتۆمییە یەکگرتووەکانی ھەردوو وڵاتە لە بەرانبەر هەڕەشەکانی کۆریای باکور.

پیۆنگ یانگ بەردەوام رەخنەی لەم مەشقە هاوبەشانە گرتووە و وەک خۆئامادەکردنێک بۆ لەشکرکێشی سەیری دەکات و هەندێکجاریش بە تاقیکردنەوەی چەک وەڵامی داوەتەوە، سیئۆل و واشنتۆن پێیان وایە کە مانۆڕە سەربازییەکان تەنیا بۆ بەرگرییە.