وەزارەتی پێشمەرگە وادەی دابەشکردنی هاوکاریی هاوپەیمانان رادەگەیەنێت و دەڵێت: هاوكاریی دارایی هاوپەیمانان بۆ مانگی حوزەیران خراوەتەسەر هەژماری بانكی وەزارەتەكەیان.

هاوكاریی هاوپەیمانان بۆ مانگی حوزەیران خرایەسەر هەژماری بانكی وەزارەتی پێشمەرگە و سبەینێ دەست بە دابەشكردنی دەكرێت.

وەزارەتی پێشمەرگە لە راگەیەندراوێكدا بڵاویكردەوە، هاوكاریی دارایی هاوپەیمانان بۆ مانگی حوزەیران خراوەتەسەر هەژماری بانكی وەزارەتەكەیان، بەڕێوەبەرایەتی گشتی بودجە و بەرنامەكانی وەزارەتیشیان رێكارە دارایی و كارگێڕییەكان بۆ دابەشكردنی هاوكارییەكە رادەپەڕێنێت.

راشیگەیاند، سبەینێ دەست دەكرێت بە دابەشكردنی هاوكاریی هاوپەیمانان بۆ مانگی حوزەیران بەسەر هێزی پێشمەرگەدا.

دەم پارتی پێشنیازەكانی خۆی دەربارەی یاسای چوارچێوە بۆ ئاشتی ئاراستەی سەرۆكی پەرلەمانی توركیا كرد.

تولای هاتیمۆئوغولڵاری و تونجەر باكرهان، هاوسەرۆكانی گشتیی دەم پارتی، لە راگەیەندراوێكی هاوبەشدا ئاشكرایان كرد كە لە دیداریان لەگەڵ نوعمان كورتولموش، سەرۆكی پەرلەمانی توركیا، پێشنیازەكانی خۆیان دەربارەی "یاسای چوارچێوە" پێشكەش كردووە.

جەختیشیان لەوە كردەوە، دەبێت یاساكە ببێتە بنەمایەكی بڕواپێكراو بۆ چارەسەری دیموكراتیانەی كێشەی كورد و زەمینی ئازادكردنی عەبدوڵا ئۆجەلان خۆشبكرێت و و پێگەكەشی جێگیر بكرێت و سەرجەم لایەنەكان لە خۆ بگرێت.

لە راگەیەندراوەكەدا ئاماژە بەوەشكراوە كە چارەسەری پرسی كورد  لەسەرووی بەرژەوەندیی پارتەكانە و یاسای چارەسەری دەبێت پارێزگاری لە كەرامەتی 86 ملیۆن هاووڵاتی بكات. هاوكات پشتگیریی هەوڵ و رۆڵی ئەرێنیی سەرۆكی پەرلەمانیان بۆ سەركەوتنی پرۆسەی ئاشتی دەربڕی.

دۆناڵد ترەمپ، سەرۆکی ویلایەتە یەکگرتووەکانی ئەمریکا لە کۆشکی سپی پێشوازی لە جۆزێف عەون، سەرۆکی لوبنان کرد و لە کۆبوونەوەیەکی هاوبەشدا پەیوەندییە دووقۆڵییەکان و ئاڵۆزییەکانی ناوچەکەیان تاوتوێ کرد.

لەمیانی کۆنگرەیەکی ڕۆژنامەوانیی هاوبەشدا، ترەمپ جەختی کردەوە کە زۆربەی کێشەکانی لوبنان چارەسەر دەکەن، بە  حزبوڵاشەوە.

هاوکات هۆشداریی توندی ئاڕاستەی تاران کرد و رایگەیاند، گەمارۆی توندی سەر بەندەرەکانی ئێران بەردەوامە و ئاماژەی بەوەش کرد کە چیای پیکاکس لە ئێران بۆردومان دەکەن.

سەرۆکی ئەمریکا باسی لەوەش کرد کە ئێرانییەکان داوای دیدار و رێککەوتن دەکەن، جەختیشی کردەوە: ئەگەر تاران هەوڵی خستنەوەگەڕی هەر دامەزراوەیەکی ئەتۆمی بدات، راستەوخۆ بۆردومانی دەکەن.

لەبارەی ئاسایشی دەریاوانی و کەنداوەوە، ترەمپ رایگەیاند: رەوشی گەروی هورمز هیچ کاریگەرییەکی لەسەر هەڵبژاردنەکانی ئەمریکا نابێت، جەختیشی کردەوە کە بەهیچ شێوەیەک رێگە بە حوسییەکان نادەن دەریای سور دابخەن.

لای خۆیەوە، جۆزێف عەون سەرۆکی لوبنان ئاماژەی بەوە کرد: کاتی ئەوە هاتووە لوبنان ئۆقرەیی و سەقامگیری بەخۆیەوە ببێنێت.

عەون سوپاسی ترەمپی کرد لەبەرانبەر بەدیهێنانی رێککەوتنی چوارچێوەی کار لەگەڵ ئیسرائیل و رایگەیاند کە دیدگای بەیروت بۆ سەقامگیریی ناوچەکە بە تەواوی هاوتەریبە لەگەڵ دیدگای سەرۆکی ئەمریکادا.