سندوقی گەشەپێدانی عیراق هەلی وەبەرهێنان بە بەهای 40 ملیار دۆلار دەخاتە روو و باس لەوەدەكات، دەتوانرێت لەبری هاوردەكردن وەبەرهێنان لە ناوخۆدا بكرێت.

سندوقی گەشەپێدانی عیراق ئاشكرای كرد، هەلی وەبەرهێنان بە بەهای 40 ملیار دۆلار لە ئارادایە بۆ بەرهەمهێنانی ئەو كەلوپەلانەی لە جیاتی هاوردەكردنیان لە دەرەوە، لە ناوخۆی وڵاتدا بەرهەم دەهێنرێن.

محەمەد نەجاڕ سەرۆكی سندوقەكە رایگەیاند، سەرمایەی سندوقەكە بۆ پڕۆژەی وەبەرهێنانە و جیاوازە لە بودجەی گشتی كە تەنیا خەرجییە. 

ئاماژەی بەوەشكرد، سندوقەكە بەردی بناغەی  دروستكردنی ئابورییەكی جێگرەوەیە، بەتایبەت لە ئێستادا كە بودجە پەسەند نەكراوە.

روونیشیكردەوە، ئامانجی ئەم هەنگاوە گۆڕینی هاوردەكردنی ساڵانەیە بۆ دروستكردنی كارگە و وەبەرهێنانی ناوخۆیی بە هاوكاریی وەبەرهێنەرانی نێودەوڵەتە، كە ئەمەش جگە لە كەمكردنەوەی بارگرانیی هاوردەكردن، بە هەزاران هەلی كاری نوێ بۆ هاووڵاتییان دابین دەكات و دەبێتە هۆی گەشەپێدانی راستەقینەی ئابوری لە وڵاتدا.

واشنتۆن هۆشداری دەدات لە مەترسییەكانی سەر كەشتیوانیی نێودەوڵەتی و راشیگەیاندووە، وڵاتەكەیان هێشتا كراوەیە بە رووی دانوستاندا.

ماركۆ روبیۆ وەزیری دەرەوەی ئەمریكا رایگەیاند، سەرەڕای گرژییەكان، واشنتۆن هێشتا بۆ دانوستان کراوەیە، ئەوەش لەپێناو تێپەڕاندنی ناكۆكییەكان و گەیشتن بە چارەسەری سیاسی و هەمیشەیی لە رۆژهەڵاتی ناوەڕاست.

رۆبیۆ وتیشی، ئاستەنگی سەرەكی لەبەردەم رێڕەوی دیپلۆماسیدا ئەوەیە كە تاران لە ئەنجامدانی گفتوگۆكاندا جدی نییە.

لەلایەکەوە، هۆشداری دەدات لەوەی گەمارۆدان یان پەكخستنی رێڕەوە ئاوییە نێودەوڵەتییەكان مەترسیدارە و لێكەوتەكانی تەواوی ئاسیا و ئابوری جیهان دەگرێتەوە.

لەلایەکی دیکەشەوە جەختی لەوەكردەوە، هەر هەڕەشەیەك بۆ سەر ئازادیی كەشتیوانی بەتایبەت لە گەروی هورمز، زنجیرەی دابینكردن و بازرگانیی نێودەوڵەتی دەخاتە مەترسییەوە، بۆیە ئەمریكا رێگەی بەوە نادات.
 

كۆبوونەوەی ئەنجومەنی وەزیرانی هەرێم لە بارەی لێخۆشبون لە سزای هاتوچۆ و پارەی كەڵەكەبووی كارەبا و مۆڵەتی بێ موچەی فەرمانبەران بەڕێوەدەچێت.

فەرمانگەی میدیاو زانیاری ئەنجومەنی وەزیرانی هەرێم بڵاویكردەوە، لە كۆبوونەوەكەدا، سێ بڕگەی سەرەكی تاوتوێدەكرێت كە  بریتین لە پێشنیازێكی وەزارەتی ناوخۆ بۆ لێخۆشبونی سەرپێچی هاتوچۆ و خستنەرووی راپۆرتێك بە بارودۆخی نەوت و سوتەمەنی. 

تەوەری دووەمیش  تایبەتەبە بڕیاردان لەسەر پێشنیازی كارئاسانی بۆ پێدانەوەی قەرزی كەڵەكەبوی پارەی كارەبا لە لایەن هاووڵاتیان
 لە تەوەری سێ هەمیشدا، باس لە رێكخستنەوەی پێدانی مۆڵەتی بێ موچە بە مووچەخۆرانی هەرێم دەكرێت.

كۆبوونەوەی ئەنجومەنی وەزیرانی هەرێم بەرێوەدەچێت
ئەنجومەنی وەزیران تاوتوێی سێ بڕگەی سەرەكی دەكات