رۆژنامەی فایننشاڵ تایمزی بەریتانی بڵاویکردوەتەوە،  ئاستی تێپەڕبوونی نەوت بە گەروی هورمزدا بە شێوەیەکی بەرچاو کەمی کردووە و گەیشتووەتە 600 هەزار بەرمیل لە رۆژێکدا. 

ئاماژەی بەوەشکردوە، بەپێی خەمڵاندنەکانی بانکی(گۆڵدمان ساکس)، ئەم رێژەیە دابەزینێکی مەترسیدارە بەراورد بە رەوشی ئاسایی، کە پێشتر رۆژانە زیاتر لە 19 ملیۆن بەرمیل نەوتی پێدا تێدەپەڕی و ئەو بڕە یەکسان بوو بە کۆی گشتی بەرهەمهێنانی نەوتی ئەمریکا.

ئەم پاشەکشە گەورەیە لە کاتێکدایە کە گرژییە سەربازییەکان لە ناوچەکەدا کاریگەرییەکی ڕاستەوخۆیان لەسەر جووڵەی وزە و بازاڕەکانی جیهان دروست کردووە.

باڵیۆزخانەی ئەمریکا لە بەغداد هۆشدارییەکی ئەمنی توندی بڵاوکردەوە و رایگەیاند، بەهۆی بوونی هەڕەشەی جددی لەلایەن ئێران و گروپە چەکدارە نزیکەکانی، مەترسی گەورە لەسەر گیانی هاووڵاتییانی ئەمریکی و دامەزراوەکانی ئەو وڵاتە لە عیراق و هەرێمی کوردستان دروستبووە.

 باڵیۆزخانەکە جەختدەکاتەوە، کە ئەگەری هێرشکردنە سەر هوتێلەکان، کێڵگە نەوتییەکان و ئەو شوێنانەی بیانییانی لێیە هەیە، هەروەها مەترسی رفاندنی ئەمریکییەکانیش لە ئارادایە؛ بۆیە داوا لە هاووڵاتییانی دەکات بە تەواوی وریابن و لەو شوێنانە دووربکەونەوە کە دەبنە ئامانج.

سەبارەت بە گەشتکردن، باڵیۆزخانەکە ئاماژەی بەوە کردووە کە لە ئێستادا ئاسمانی عیراق داخراوە و گەشتە ئاسمانییە بازرگانییەکان راگیراون، بۆیە باشترین بژاردە بۆ جێهێشتنی عیراق بەکارهێنانی رێگەی وشکانییە بەرەو وڵاتانی (ئوردن، کوێت، سعودیە و تورکیا).

باڵوێزخانەکە،  هاوکات داوا لەو ئەمریکییانە دەکات کە لە ناوخۆی عیراق دەمێننەوە، بڕی پێویست لە خواردن، ئاو و دەرمان کۆبکەنەوە و بۆ ماوەیەکی درێژ لە شوێنی پارێزراودا بمێننەوە، جەختیشیکردەوە کە ئیدارەی سەرۆک ترەمپ و وەزارەتی دەرەوەی ئەمریکا پاراستنی گیانی هاووڵاتییانیان لەسەرووی هەموو کارە لەپێشینەکان داناوە.