بافڵ جەلال تاڵەبانی، سەرۆکی یەکێتیی نیشتمانیی کوردستان و هادی عامری، سەرۆکی هاوپەیمانیی فەتح لە بەغداد کۆبوونەوە.

لە کۆبوونەوەکەدا کە د. خالید شوانی، وەزیری دادی عیراق ئامادەیبوو، دوایین پەرەسەندنە ئەمنییەکان و هەوڵەکان بۆ رێگریکردن لە تێکچوونی زیاتری دۆخی ناوچەکەیان تاوتوێ کرد.

لە کۆبوونەوەکەدا جەخت لە پێویستیی گرتنەبەری ر‌ێکاری گونجاو بۆ پاراستنی سەقامگیریی عیراق کرایەوە.

بنیامین ناتانیاهۆ، سەرۆک وەزیرانی ئیسرائیل رایگەیاند، کە ئۆپراسیۆنە سەربازییەکانیان بە هەماهەنگییەکی توندوتۆڵ لەگەڵ ئەمریکا دژی ئێران بەردەوام دەبن، "بە هەر نرخێک بێت". 

نەتەنیاهۆ ئاشکرای کرد، کە هێزەکانیان بارەگای سەرەکی عەلی خامنەییان لە تاران وێران کردووە و توانیویانە ژمارەیەکی زۆر لە سەرکردەکانی رژێم و سوپای پاسداران لەناو ببەن؛ هەروەها ئاماژەی بەوەش کرد، کە بەڵگەی زیاتر هەن دەیسەلمێنن "خامنەیی چیتر لە ژیاندا نەماوە".

نەتەنیاهۆ جەختی لەوە کردەوە کە ئەم شەڕە دواجار دەبێتە هۆی بەدیهێنانی ئاشتی، بەڵام داوای سەبر و بەرگەی زیاتری کرد.

هەروەها سوپاسی سەرۆک دۆناڵد ترەمپی کرد بۆ "سەرکردایەتییە مێژووییەکەی" و جەختی کردەوە، کە رژێمی ئێران نابێت دەستی بە چەکی ئەتۆمی رابگات، چونکە مەترسییە بۆ سەر بوونی ئیسرائیل.

 لە کۆتاییدا نەتەنیاهۆ داوای لە گەلی ئێران دەکات دەسەڵاتی ئێستای ئێران بڕوخێنن و رایگەیاند ئێستا دەرفەتێکی مێژوویی بۆ ئێرانییەکان رەخساوە تاوەکو خۆیان چارەنووسی خۆیان دیاری بکەن.