تا ئێستا 59 کەس لە ژێر داروپەردوی خوێندگەیەکی ئایینیدا لە ئیندۆنیزیا گیریان خواردووە
محەمەد رزگار
٢ی تشرینی یەکەمی ٢٠٢٥
لە ئیندۆنیزیا 59 کەس لە ژێر داروپەردوی باڵەخانەی خوێندگەیەکی ئایینیدا گیریان خواردووە و تا ئێستا رزگارنەکراون.
دەسەڵاتدارانی ئیندۆنیزیا رایانگەیاند، رۆژی دووشەممە بەهۆی داڕمانی خوێندگەیەک لە دورگەی جاڤا، تائێستا 59 کەس لە ژێر داروپەردوی باڵەخانەی خوێندگەکەدا گیریان خواردووە و نەتوانراوە رزگاربکرێن.
ئاماژەیان بەوەشکردووە، هەر بەهۆی ئەو داڕمانەوە تائێستا پێنج کەس گیانیان لەدەستداوە.
وتەبێژی دەزگای نیشتمانیی بەڕێوەبردنی کارەساتەکان لە ئیندۆنیزیا ئاشکرایکرد، هێشتا 59 کەس لەژێر داروپەردودا گیریان خواردوە و زۆربەیان خوێندکارن و تەمەنیان لە نێوان 12 بۆ 17 ساڵاندایە.
ئەوەش خراوەتەڕوو، لێکۆڵینەوە بۆ هۆکاری کارەساتەکە دەستپێکردووە، بەڵام هێشتا هۆکارەکەی ئاشكرانهكراوه.
