بەهۆی قووڵبوونەوەی ناکۆکییە حزبییەکان، عەلی باپیر داوای گۆڕینی عەقڵییەتی حوکمڕانی لە هەرێمی کوردستان دەکات و جەخت لەوە دەکاتەوە کە ئەم وڵاتە موڵکی گشت خەڵکە و نابێت لەبەر ململانێکان، خزمەتکردنی هاووڵاتیان پشتگوێ بخرێت.

عەلی باپیر، سەرۆکی کۆمەڵی دادگەریی کوردستان، لە ڕۆژی دووەمی کۆڕبەندی ئابوری نێودەوڵەتی دێڵفی لە شاری سلێمانی لە دیبەتێکدا سەبارەت بە رەوشی ئێستای هەرێمی کوردستان هۆشداری دەدات و رایدەگەیەنێت، دۆخی هەرێم لەبەردەم هەڕەشە و مەترسیدایە.

عەلی باپیر ئاماژەی بەوەکرد، هەرچەندە پارتی و یەکێتی جەخت لە چارەسەرکردنی کێشەکان دەکەنەوە، بەڵام لە واقیعدا رەوشەکەتادێت خراپتر دەبێت و وتی، رەوشی ئێستای هەرێمی کوردستان جێگەی دڵخۆشی نییە و پێویستە عەقڵییەتی حوکمڕانی لە هەرێمدا بگۆڕدرێت.

سەرۆکی کۆمەڵی دادگەری، سەرەڕای رەخنەگرتن لە دەسەڵاتدارانی هەرێم، حکومەتی عیراق و هاووڵاتیانیشی بە کەمتەرخەم زانی بەرانبەر بەو رەوشەی ئێستا هەیە. هاوکات جەختی لەوەکردەوە، نابێت لەبەر ململانێی حزبی، خزمەتکردنی خەڵک لەبیر بکرێت، چونکە ئەو وڵاتە موڵکی هەمووانە نەک تەنها حزب و لایەنێک.

عەلی باپیر داواشی لە پارتی و یەکێتی کرد، لەسەر بنەمای ئیدارەدانێکی دادپەروەرانە رێکبکەون، چونکە ناحەزان سود لەو کەلێن و ناکۆکییانە وەردەگرن کە لەنێوان لایەنەکاندا هەیە.

لە کۆتایی دیبەیتەکەدا، عەلی باپیر بەرپرسیارێتییەکی گشتی خستە ئەستۆی هەموو لایەک و رایگەیاند، پێویستە حوکمڕانان دڵ و دەروونیان فراوان بکەن، چونکە هەموومان بەرانبەر بەوەی لە هەرێمی کوردستان دەگوزەرێت بەرپرسیارین.

لە درێژەی کۆڕبەندی دێڵفی لە سلێمانی، قوباد تاڵەبانی بانگەوازی بۆ وەبەرهێنان لە کەرتی گەشتوگوزار و سێکتەرە جیاوازەکان کرد و جەختی لەوە کردەوە کە پێویستە دەرفەتەکان بگۆڕدرێن بۆ سەرکەوتن و پێشخستنی گشت ناوچەکانی هەرێمی کوردستان.

لە ڕۆژی دووەمی کۆڕبەندی ئابوری نێودەوڵەتی دێڵفی لە شاری سلێمانی، قوباد تاڵەبانی جەختی لە گرنگیی بەستنی ئەم کۆڕبەندە بۆ ناوچەکە کردەوە و رایگەیاند: گفتوگۆکانی ئێرە تەنها قسە نین و بە ئامانجی ئەوەن کە لە داهاتوودا بەرجەستە ببن.

قوباد تاڵەبانی لە وتارەکەیدا تیشکی خستەسەر ئاڵنگارییە ئابورییەکان و ئاماژەی بەوەدا، پێویستە هەرێمی کوردستان بە تەنها پشت بە داهاتی نەوت نەبەستێت، بەڵکو دەبێت کار بۆ هەمەچەشنکردنی سەرچاوەکانی داهات بکات، لەو چوارچێوەیەشدا، جەختی لەسەر گرنگیی وەبەرهێنان لە سێکتەرە جیاوازەکاندا کردەوە، بەتایبەت کەرتی گەشتوگوزار کە سلێمانی پێگەیەکی تایبەتی بۆ کولتوور و هونەر هەیە.

سەبارەت بە بەشداریی کۆمەڵایەتی، قوباد تاڵەبانی پێداگریکرد لەسەر ئەوەی دەبێت ژنان بەشێکی سەرەکی بن لە پرۆسەی کارکردن، هەروەها جەختی لەوە کردەوە کە سەرکەوتن تەنها لە پایتەختەوە نابێت، بەڵکو پێویستە هەموو ناوچەکان بە یەکسانی گرنگییان پێ بدرێت.

لەسەر ئاستی پەیوەندییەکانی هەرێم و عیراق، قوباد تاڵەبانی ئەوەی خستەڕوو، سەرکەوتنی کوردستان و عیراق هاوتەریب و پەیوەستن بەیەکەوە، بۆیە پێویستە پەیوەندیی نێوان هەولێر و بەغداد لەسەر بنەمای سەرکەوتنی هاوبەش بێت.

ئاماژەی بەوەشدا، عیراق پێویستی بە ململانێ نییە و تێچووی بەردەوامیی ئەو ململانێیانە زیان بە خەڵکی عیراق دەگەیەنێت، بۆیە دەبێت دەرفەت بدەین بە ئاشتی و سەقامگیری، حکومەتی نوێی عیراقیش دەرفەتێکی گرنگە بۆ بنیاتنانی وڵاتێکی نوێ.

قوباد تاڵەبانی لە کۆتایی وتارەکەیدا بەڵێنیدا، بە کردەوە کار بۆ گۆڕینی دەرفەتەکان بۆ سەرکەوتن دەکەن و ئاشکرایکرد، ئێمە تەماشاکار نابین، بەڵکو کار بۆ هاوسەنگی لە عیراق و داهاتوویەکی باشتر بۆ گەلەکەمان دەکەین، چونکە سەرکەوتن تەنها گەشەکردن نییە، بەڵکو بەردەوامییە.

ئەمڕۆ كۆتا رۆژی بەڕێوەچوونی كۆڕبەندی ئابوری دێڵفییە لە سلێمانی و تیایدا حەوت پانێڵی گرنگ لەلایەن پسپۆڕان و چەند كەسایەتیەكی سیاسیەوە پێشكەش.

لە سەرەتای كۆڕبەندەكەدا سیمیۆن سۆمۆكۆس، دامەزرێنەری دیداری ئابوریی دێڵفی و قوباد تاڵەبانی جێگری سەرۆك وەزیرانی هەرێم وتاریان دەبێت.

هاوكات حەوت پانێڵ پێشكەش دەكرێن، لەوانەش، گواستنەوەی وزە و رەوشی رۆژهەڵاتی ناوەڕاست لەلایەن بێگەرد تاڵەبانییەوە تاوتوێ دەكرێت.

پانێڵی داهاتووی هەرێمی كوردستان لە چوارچێوەی گۆڕانكارییەكانی ناوچەكە بە میوانداری عەلی باپیرەوە پێشكەش دەكرێت.

عیراق و كوردستان لە نێوان زلهێزەكاندا بە بەشداری ئەحمەد داودئۆغلو و هەروەها پانێڵی هەڵسەنگاندنی پرۆسەی ئاشتیی توركیا لەلایەن ژمارەیەك سیاسەتمەداری باكوری كوردستانەوە پێشكەش دەكرێت.