بەهۆی زیادبوونی پیسبوونی هەوا لە پارێزگای خۆزستان، لە ماوەی 48 سەعاتی رابردوودا 1400 کەس بەهۆی کێشەی دڵ و هەناسەدانەوە سەردانی ناوەندە تەندروستییەکانیان کردووە.

دکتۆر مه‌یسه‌م موعزی، یاریدەدەری کاروباری چارەسەریی زانکۆی زانستە پزیشکییەکانی جندی شاپوری ئەهواز رایگەیاند، پیسبوونی هەوا لەم پارێزگایە کاریگەریی نەرێنی لەسەر تەندروستیی هاووڵاتییان داناوە و بەهۆیەوە لە ماوەی دوو رۆژی رابردوودا نزیکەی 1400کەس سەردانی نەخۆشخانەکانیان کردووە.

ناوبراو ئاماژەی بەوەشکرد کە دۆخی ئێستای کەشوهەوا بۆ توشبووانی نەخۆشییەکانی دڵ و بۆرییەکانی خوێن، ژنانی دووگیان، منداڵان، بەساڵاچووان و ئەو کەسانەی کە دەرمانی تایبەت بەکاردەهێنن، زۆر مەترسیدارە و داوای لێکردن لە ماڵەکانیان نەیەنە دەرەوە.

یاریدەدەری کاروباری چارەسەریی زانکۆی زانستە پزیشکییەکانی ئەهواز جەختی لەوە کردەوە کە پێویستە هاوڵاتییان رێنماییە تەندروستییەکان جێبەجێ بکەن و لەکاتی دەرکەوتنی هەر نیشانەیەکی کێشەی دڵ و هەناسەدان، بەخێرایی سەردانی نزیکترین ناوەندی تەندروستی بکەن.

 

 

دۆناڵد ترەمپ، سەرۆکی ویلایەتە یەکگرتووەکانی ئەمریکا، ئەمڕۆ رایگەیاند کە ئێلیزابێت تسورکۆڤ، خوێندکاری زانکۆی پرینستۆن، هاووڵاتیەکی ئەمریکییە، لە دەست کەتائیبی حزبوڵڵا ئازاد کراوە و ئێستا بە سەلامەتی لە باڵیۆزخانەی ئەمریکایە لە عیراق.

ترەمپ لە پەیامەکەیدا جەختی لەسەر پابەندبوونی خۆی کردەوە و وتی: "من هەمیشە بۆ دادپەروەری تێدەکۆشم و هەرگیز واز ناهێنم." هاوکات، ترەمپ بە توندی داوای لە بزووتنەوەی حەماس کرد و وتی: "حەماس، بارمتەکان، ئێستا ئازاد بکەن!"

ئەمەش لە کاتێکدایە کە پێشتر، ئێلیزابێت تسورکۆڤ لە گرتە ڤیدیۆیەکدا کە شەوی 13-11-2023 بڵاوکرایەوە، رایگەیاندبوو: "ناوم ئێلیزابێت تسورکۆڤە، هاووڵاتییەکی ئیسرائیلیم، تەمەنم 37 ساڵە. ئیسرائیلم بەجێهێشت و چوومە ویلایەتە یەکگرتووەکانی ئەمریکا و بۆ بەرژەوەندیی مۆساد و CIA کارمکردووە. لە سوریا کارمکردووە بۆ دروستکردنی پەیوەندی لەنێوان ئیسرائیل و هێزەکانی سوریای دیموکرات لە باکووری رۆژهەڵاتی سوریا، و لە ساڵی 2022 بە سیفەتی ئەوەی سەر بە مۆساد و CIA بووم سەردانمکردووە."

دۆناڵد ترەمپ، سەرۆکی ویلایەتە یەکگرتووەکانی ئەمریکا، لە پۆستێکدا لە تۆڕی کۆمەڵایەتی 'تروت سۆشیاڵ' لەبارەی هێرشەکەی ئیسرائیل بۆ سەر سەرکردەکانی حەماس لە دەوحە، پایتەختی قەتەر، رایگەیاند کە هێرشەکە "ئۆپەراسیۆنێکی تەواو سەربەخۆ" بووە و "بڕیاری من نەبووە." ترەمپ جەختی لەسەر پێگەی قەتەر وەک "هاوپەیمانێکی بەهێز" کردەوە و داوای کرد جەنگەکە دەستبەجێ کۆتایی بێت.

ترەمپ لە پۆستەکەیدا نووسیبووی: "بەیانی ئەمڕۆ، ئیدارەی ترەمپ لەلایەن سوپای ویلایەتە یەکگرتووەکانی ئەمریکاوە ئاگادارکرایەوە کە ئیسرائیل هێرشی کردووەتە سەر حەماس، کە بەداخەوە، لە بەشێک لە دەوحە، پایتەختی قەتەر جێگیر بووبوون. ئەمە بڕیارێک بوو لەلایەن سەرۆکوەزیران ناتانیاهۆوە، بڕیاری من نەبوو."

سەرۆکی ئەمریکا رەخنەی لە هێرشە تاکلایەنەییەکە گرت و رایگەیاند: "بۆردوومانکردنی تاکلایەنە لەناو قەتەردا، کە وڵاتێکی سەروەر و هاوپەیمانێکی نزیکی ویلایەتە یەکگرتووەکانە، و زۆر بە سەختی و بە جورئەتەوە لەگەڵمان کار دەکات بۆ نێوەندگیریی ئاشتی، لە خزمەتی ئامانجەکانی ئیسرائیل یان ئەمریکادا نییە."

لە هەمان کاتدا ترەمپ ئاماژەی بەوەدا: "بەڵام، لەناوبردنی حەماس، کە قازانجی لە نەهامەتییەکانی دانیشتووانی غەززە کردووە، ئامانجێکی شایستەیە."

ترەمپ ئاشکرای کرد کە "دەستبەجێ رێنماییم دا بە نێردەی تایبەت ستیڤ ویتکۆف بۆ ئەوەی قەتەرییەکان لەبارەی هێرشە نزیکبووەکەوە ئاگادار بکاتەوە، کە ئەویش کردی، بەڵام بەداخەوە، زۆر درەنگ بوو بۆ وەستاندنی هێرشەکە."

لە درێژەی قسەکانیدا، ترەمپ جەختی لەسەر پەیوەندییەکانی لەگەڵ قەتەر کردەوە: "قەتەر بە هاوپەیمانێکی بەهێز و دۆستی ویلایەتە یەکگرتووەکان دەبینم، و زۆر دڵگرانم بە شوێنی هێرشەکە. من دەمەوێت هەموو بارمتەکان، و تەرمی مردووەکان، ئازاد بکرێن، و ئەم جەنگە، ئێستا، کۆتایی بێت!"

سەرۆکی ئەمریکا رایگەیاند کە دوای هێرشەکە لەگەڵ بنیامین ناتانیاهۆ، سەرۆکوەزیرانی ئیسرائیل، قسەی کردووە. "سەرۆکوەزیران پێی وتم کە دەیەوێت ئاشتی بەدیبهێنێت. پێموایە ئەم روداوە ناخۆشە دەتوانێت وەک دەرفەتێک بۆ ئاشتی خزمەت بکات."

ترەمپ هەروەها لەگەڵ ئەمیر و سەرۆکوەزیرانی قەتەر قسەی کردووە و سوپاسی پاڵپشتی و دۆستایەتییان کردووە بۆ ئەمریکا. "دڵنیام کردنەوە کە شتێکی لەو جۆرە جارێکی دیکە لەسەر خاکەکەیان رونادات."

لە کۆتاییدا، ترەمپ ئاشکرای کرد کە "رێنماییم بە وەزیری دەرەوە، مارکۆ روبیۆ، داوە بۆ تەواوکردنی رێککەوتنی هاوکاریی بەرگری لەگەڵ قەتەر."