وەزارەتی پەروەردەی حکومەتی هەرێم چەند رێنماییەکی نوێی تایبەت بە خوێندکارانی پۆلی 12 بڵاوکردەوە و ئاماژەی بەوەکردووە، ئەمساڵ هیچ جۆرە کۆنفرانسێکی رۆژنامەوانی و مەراسیمێک بۆ راگەیاندنی ئەنجامەکان ناکەن و لەرێگای دیجیتاڵییەوە نمرە دەدرێتەوە بە خوێندکاران.

وەزارەتی پەروەردەی حکومەتی هەرێم چەند بڕیارێکی تایبەت بە راگەیاندنی ئەنجامی تاقیکردنەوەی نیشتمانیی پۆلی 12 راگەیاند، کە تیایدا هاتووە، ئەمساڵبە رێگای دیجیتاڵی ئەنجامەکان رادەگەیەنرێت و هیچ کۆنفرانسێکی رۆژنامەوانی نابەسترێت.

ئەوەش هاتووە، هیچ پلەبەندییەک و هیچ پێوەرێک لەسەر ئاستی تاک بۆ ناساندنی ئاستەکانی یەکەم و دووەم و سێیەم راناگەیەنرێت و نە وەزارەت نە دامودەزگا پەروەردەییەکان لە هیچ پەروەردەیەکدا مەراسیمی خەڵاتکردن ئەنجام نادەن.

وەزارەتی پەروەردە دەشڵێت، ئەگەر سەرپێچی ئەو خاڵانە بکرێت، ئەوا رێکاری کارگێڕی و یاسایی بەرانبەر سەرپێچیکار دەگیرێتە بەر.

بەپێی بڕیارەکانی پەروەردە، بنەمای هەڵسەنگاندن دەگۆڕێت و رێژە و تێکڕای نمرەی دەرچوونی خوێندکاران دوای راگەیاندنی ئەنجامەکانی خولی دووەم، دەبنە پێوەر بۆ دیاریکردنی ئاستی زانستی خوێندنگەکان، هەروەها "نمرەی پێوانەیی" و "تێکڕای ژمێرەیی" هەر بابەتێکی پۆلی 12، دوای تەواوبوونی خولی دووەم دەبنە بنەمای هەڵسەنگاندنی مامۆستایان.

ئەوەش لە کاتێکدایە، ساڵانی رابردوو بۆ راگەیاندنی ئەنجامەکانی پۆلی 12، کۆنفرانسی رۆژنامەیی دەبەسترا و لە مەراسیمێکدا سێ یەکەمەکەی سەر ئاستی هەرێم رادەگەیەنران و خەڵات دەکران.

بەرگری شارستانی هەرێم رایگەیاند، شەوی رابردوو دوو گەنج لە رووباری خابووردا خنکاون.

بەڕێوەبەرایەتی گشتیی بەرگری شارستانیی هەرێم رایگەیاند، سەعات 11:00ی شەوی رابردوو ئاگادارکراونەتەوە بە بوونی روداوێکی خنکان لە رووباری خابووری زاخۆ.

ئاماژەی بەوەشکردووە، دوای گەیشتنی تیمەکان بۆ شوێنی روداوەکە دەرکەوتووە کە دوو گەنجی تەمەن 16 ساڵ لە رووباری خابووردا خنکاون.

ئەوەش هاتووە، دوو گەنجەکە دانیشتووی زاخۆبوون و هەر شەوی رابردوو تەرمەکانیان دەرهێنراوەتەوە و رەوانەی پزیشکی دادی زاخۆ کراون.

روداوەکانی خنکان یەکێن لە هۆکارەکانی گیانلەدەستدان لە هەرێم، کە بەهۆی نەزانینی مەلە، یان نەشارەزایی لە سروشتی ناوچەکە و ئەو ئاوەی مەلەی تێدا دەکرێت روودەدەن، بەرگری شارستانیش هەمیشە داوا لە هاووڵاتیان دەکات، لە ئاوی چەم و رووبارەکاندا مەلە نەکەن، یانیش لە ئاوی ناوچەیەکدا مەلە نەکەن کە یەکەمجاریانە بۆی دەچن و شارەزای نین.

بەرەبەیانی ئەمڕۆ چەند چەکدارێکی نەناسراو لە بەسڕە تەقەیان لە نوسینگەی ئەندامێکی ئەنجومەنی نوێنەرانی عیراق کردووە و دواتر هەڵاتوون.

مستەفا جەبار ئەندامی ئەنجومەنی نوێنەرانی عیراق ڤیدیۆی کامێراکانی چاودێری بڵاوکردووەتەوە و تیایدا دەردەکەوێت، چەند چەکدارێکی نەناسراو سەعات 2:00ی بەرەبەیان بە ئۆتۆمبێلێکی جۆری کۆرۆلاوە تەقە لە نوسینگەکەی دەکەن.

لە راگەیەنراوێکدا ئەو ئەندامەی ئەنجومەنی نوێنەران رایگەیاندووە بۆ پاراستنی ئارامی ئەو گەڕەک و شەقامەی نوسینگەکەی لێیە، هەروەها دڵنیابوونەوە لە سەلامەتی پاسەوانەکانی، بڕیاریانداوە بەوەی نوسینگەکەی لە بەسڕە دابخەن، ئەگەرچی تاکە نوسینگەیەتی لەو پارێزگایە.

ئەمە دووەم هێرشی لەو جۆرەیە لەماوەی پێنج مانگی رابردوودا بکرێتە سەر نوسینگەی مستەفا جەبار، هەرچەندە تۆمەتبارانی هێرشی یەکەم بڕیاری دەستگیرکردنیان بۆ دەرچوو، کە بە "بەکرێگیراو" ناویان هێنرابوو، بەڵام هێشتا روون نەبووەتەوە ئاخۆ تۆمەتباری سەرەکی پشتی روداوەکە کێ بووە.