لە سنوری کەرکوک 12هاووڵاتی بیانی دەستگیرکران
ساکۆ سمکۆ
٤ی تشرینی دووەمی ٢٠٢٦
شەوی رابردوو لە سنووری ناحیەی شوانی سەر بە پارێزگای کەرکوک، هێزەکانی پۆلیس توانییان 12 هاووڵاتیی بیانی دەستگیر بکەن، کە بەشێوەیەکی نایاسایی و بەپێ بەرەو ناو شاری کەرکوک دەڕۆیشتن.
سەرچاوەیەک لە پۆلیسی ناحیەی شوان بە کوردسات نیوزی راگەیاند: دوای ئەوەی زانیاری بە پۆلیسی ناوچەکە درا لەسەر جوڵەی گوماناویی چەند کەسێک لە سنوری ناحیەی شوان و گوندی حەسار، دەستبەجێ هێزەکانی پۆلیس گەیشتنە شوێنی مەبەست؛ لە ئەنجامدا دەرکەوت 12 هاووڵاتیی بیانین و بەپێ بەرەو کەرکوک دەڕۆن، کە هیچ جۆرە چەک و کەرەستەیەکیان پێ نەبووە، سەرجەمیشیان دەستگیر کران.
بە وتەی سەرچاوەکەی پۆلیس، ناسنامەی دەستگیرکراوەکان ئاشکرا بووە کە حەوت کەسیان هاووڵاتیی ئەفغانستان و پێنج کەسەکەی دیکەیان هاووڵاتیی پاکستانن.
لەبارەی هۆکاری گەیشتنیان بەو ناوچەیە، سەرچاوەکەی پۆلیس ئاماژەی بەوەش کرد؛ لە ئەنجامی لێکۆڵینەوە سەرەتاییەکاندا دەرکەوتووە ئەو کەسانە لەلایەن باندێکی قاچاخچێتییەوە فریو دراون و بەڵێنی ئەوەیان پێدرابوو کە لە شارەکانی هەرێمی کوردستانەوە بیانگوازنەوە بۆ باشوری عیراق، بەڵام باندە قاچاخچییەکە لە سنوری ناحیەی شوان لە ئۆتۆمبێل دایانبەزاندوون و لەوێ بەجێیانهێشتوون.
