یەکێتیی زانایانی ئایینی ئیسلامی کوردستان، پەیامێکی بڵاوکردووەتەوە تێیداهاتووە، "هەواڵێک بڵاوبووەوە کە گوایە مەلایەک لە کەلار دەستگیرکراوە و وێنەی نەشیاو لەناو موبایلەکەیدابووە، ئەو کەسە مەلا نییە و دەرچووی هیچ ناوەندێکی خوێندنی ئایینیش نیە".

د. عەبدوڵا شێرکاوەیی، وتەبێژی یەکێتیی زانایانی ئایینی ئیسلامی کوردستان رایگەیاندووە: دوای بڵاوبوونەوەی هەواڵی کەسێک لە کەلار، گوایە وێنەی نەشیاو لەناو مۆبایلەکەیەوە هەبووە، لەناو دەزگایەکانی راگەیاندن و سۆشیال میدیا بە مەلا بڵاوکرایەوەو لەم پەنایە هێرشی ناڕەوا کرایە سەر مامۆستایانی ئایینی، لە کاتێکدا ئەو کەسە هیچ پەیوەندی بە پیشە و کاری مەلایەتیەوە نیە و دەرچووی هیچ ناوەندێکی خوێندنی ئایینیش نیە.

"ئەو کەسە سێ ساڵ بەر لە ئێستا خۆبەخشانە ماوەیەک کەم کاری پێشنوێژی کردووەو قورئانی خوێندووە و دوورخراوەتەوە، بۆ دڵنیایی هەموو لایەک، ئەو کەسە هیچ بڕوانامە و سیفەتێکی رەسمی مەلایەتی نەبووە، لەهەمان کات نە ئەندامی یەکێتی زانایانە، نە فەرمانبەر و خۆبەخشی فەرمی ئەوقافیشە"، وتەبێژی یەکێتی زانایانی ئایینی ئیسلامی کوردستان وادەڵێت.

لە راگەیەندراوەکەشدا هاتووە، نیگەرانی زۆرمان لە دەزگایەکانی راگەیاندن و سۆشیال میدیا ئەوەیە، کە بە هەستیاری و وەک خۆی مامەڵە لەگەڵ هەواڵ و روداوەکان ناکەن و پیشە و ناوی پیرۆزی مەلایەتی لەبەر هەڵەی کەسێکی نا مەلا دەزڕێنن، کە بەداخەوە نەدەبوو بەشێکی کەناڵ و ماڵپەڕو تۆڕە کۆمەڵایەتیەکان بەو شێوەیە بڵاوی بکەنەوە، بە بێ بەڵگە لەسەر هەموو مامۆستایانی ئایینی حیساب بکرێت، چونکە هەر کەس دەنگخۆش بوو یان پێشنوێژی کرد یان دوو ئایەت و فەرمودەی خوێندەوە و خۆی بەبانگخواز ناساند، مانای ئەوە نیە مەلا بێت، داواش لە لایەنی پەیوەندیدار دەکەین رێکاری توندتر بەرانبەر ئەو کەسانە بگرنە بەر کە مۆڵەت و رێپێدانی مەلایەتیان نیە و مزگەوت بەکار دەهێنن.