دۆناڵد ترەمپ، سەرۆکی ئەمریکا لە چاوپێکەوتنێکدا رایگەیاند، لە جیهانی سیاسەتدا متمانەی بە هیچ کەسێک نییە، لەگەڵ ئەوەشدا هاوکارییەکانی لەگەڵ بنیامین ناتانیاهۆ بەرز نرخاند و جەختی لەوە کردەوە کە پێکەوە سەرکەوتنی گەورەیان تۆمار کردووە.

دۆناڵد ترەمپ لە لێدوانێکدا بۆ کەناڵی نیوزمکس، لە وەڵامی پرسیارێکدا سەبارەت بەوەی کە ئایا متمانەی بە بنیامین ناتانیاهۆ، سەرۆکوەزیرانی ئیسرائیل هەیە، وتی: "راستییەکەی، لە جیهانی سیاسەتدا متمانەم بە هیچ کەسێک نییە."

سەرۆکی ئەمریکا ستایشی پەیوەندییە نێوان هەردوولای کرد و ئاماژەی بەوەشکرد، پەیوەندییەکی زۆر باشیان هەبووە، بەتایبەت لە سەردەمی بەرەنگاربوونەوە و جەنگی دژی کۆماری ئیسلامیدا و پێکەوە گەیشتوونەتە سەرکەوتنی باش.

سەبارەت بە هەڵبژاردنەکانی داهاتووی ئیسرائیل کە بڕیارە لە 27ی تشرینی یەکەم بەڕێوە بچێت، ترەمپ بانگەشەی ئەوەی کرد، ئیسرائیلییەکان دەیانەوێت ئەو رۆڵی هەبێت لە پرۆسەکەدا، بەڵام ترەمپ لە دەربڕینی پاڵپشتیی یان بەشداریکردن تیایدا بە دوور گرت. 

لە کۆتایی لێدوانەکانیدا، ترەمپ باسی لە پێگەی جەماوەریی خۆی لەنێو دەنگدەرانی ئیسرائیلدا کرد و بانگەشەی ئەوەی کرد، خەڵکی ئیسرائیل پێی دەڵێن، ئەگەر من خۆم بۆ پۆستی سەرۆک وەزیران کاندید بکردایە، %99ی دەنگەکانم بەدەست دەهێنا."

حکومەتی ژاپۆن سەرقاڵی داڕشتنی پلانێکی نوێیە بۆ ئەوەی تا ساڵی 2030 ژمارەی هەڵدانی کەشتییە ئاسمانییەکانی بۆ 30 موشەک لە ساڵێکدا بەرز بکاتەوە و ئەمەش وەک هەنگاوێک بۆ بەهێزکردنی کەرتی ئابوری و بەدەستهێنانی سەربەخۆیی زیاتر لە کایەی بۆشایی ئاسماندا.

بەپێی راپۆرتێکی رۆژنامەی 'نیکای'ـی ژاپۆنی، وەزارەتی ئابوری، بازرگانی و پیشەسازی بۆ ساڵی دارایی داهاتوو داوای 76 ملیار یەن (نزیکەی 480 ملیۆن دۆلاری ئەمریکی) کردووە، بە مەبەستی دروستکردنی سەکۆی هەڵدانی کەشتیی ئاسمانیی نوێ لە بنکەکانی 'ئۆچینۆرا' و 'تانێگاشیما'ـی سەر بە ئاژانسی (JAXA)، تا بتوانرێت بە لە یەک کاتدا ئامادەکاری بۆ هەڵدانی چەندین کەشتی بکرێت.

لە راپۆرتەکەدا ئەوەش هاتووە، تۆکیۆ چاوی لەوەیە لە داهاتوودا کەشتیی ئاسمانی بۆ وڵاتانی دیکەش هەڵبدات.

هاوکات، لە نێوان ساڵانی 2015 بۆ 2024 لە کۆی 130 مانگی دەستکرد تەنیا 65 دانەیانی لە ناوخۆی وڵاتەوە هەڵداوە و ئەوانی دیکەی لەڕێگەی هاوبەشەکانیەوە (بە تایبەت ئەمریکا) ناردووەتە خولگەی زەوی؛ ئەوەش لە کاتێکدایە روسیا 100% و چین 99%ـی مانگە دەستکردەکانیان لەڕێگەی بنکەکانی خۆیانەوە هەڵدەدەن.

 

وەزارەتی ناوخۆی عیراق رایگەیاند، لەسەر راسپاردەی عەلی زەیدی، سەرۆک وەزیرانی عیراق  تێچوی دەرکردنی پاسپۆرتی عیراقی بە 91 هەزار دینار دەمێنێتەوە  و زیاد ناکرێت.

ئەمڕۆ پێنجشەممە، وەزارەتی ناوخۆی عێراق لە راگەیەندراوێکدا رایگەیاند، تێچوی دەرهێنانی پاسپۆرت زیاد ناکرێت و وەک خۆی دەمێنێتەوە.

ئاماژەی بەوەشکردوە، ئەم بڕیارە لە چوارچێوەی جێبەجێکردنی رێنماییەکانی عەلی زەیدی، سەرۆک وەزیرانی عیراقدا دراوە.

ئەمەش لە کاتێکدایە، دەنگۆی ئەوە بڵاوکراوەیەوە، کە رسوماتی دەرهێنانی پاسپۆرت گۆڕانکاری بەسەردا دێت و لە 91 هەزار دینارەوە دەکرێت بە 101 هەزار دینار.