وەزارەتی خوێندنی باڵای هەرێم رایگەیاند، ئەو کەسانەی وەک گرێبەست دادەمەزرێن لە زانکۆ و ناوەندە حکومییەکاندا، لە هەمان کاتدا لە سێ یەکەمەکانی زانکۆ و پەیمانگەکانن، مافی سێ یەکەمییان پارێزراو دەبێت.

د.توانا نەجەف بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵا رایگەیاند، سێ یەکەمەکانی زانکۆ و پەیمانگەکان، دەتوانن داواکاریی پێشکەشبکەن بۆ دامەزراندن بە شێوازی گرێبەست، بەبێ ئەوەی مافی یەکەمیان لەدەست بدەن.

ناوبراو ئاماژەی بەوەشکرد، وابریارە لە چەند رۆژی داهاتوو پلاتفۆرمەکە کە تایبەتە دامەزراندن بە شێوازی گرێبەست  لە نیو وەزارەتی خوێندنی باڵا کارا بکرێت.

لەبارەی دامەزراندنی سێیەکەمەکانیشەوە، د.توانا نەجەف وتویەتی دڵنیایە، کە دۆسیەی سێ یەکەمەکان لە ئەنجومەنی وەزیرانی هەرێمی کوردستان کاری تەواوی لەسەر دەکرێت و بەرگریشی لێدەکرێت، چونکە بە یاسا مافی خۆیانە دابمەزرێندرێن.

ئەمەش لە کاتێکدایە، رۆژی 2ـی8ـی 2026، وەزارەتی خوێندنی باڵا و توێژینەوەی زانستی هەرێم لە نوسراوێكدا داتا و زانیاری سەرجەم سێ یەكەمەكانی زانكۆ و پەیمانگەكانی هەرێم، كە دەرچووی ساڵانی 2017 تا 2025ن، لەگەڵ هەڵگرانی بڕوانامەی دبلۆمی باڵا و ماستەر و دكتۆرا، كە تائێستا دانەمەزراون، ئاڕاستەی ئەنجومەنی وەزیرانی هەرێمی كرد، بە مەبەستی دابینكردنی میلاك و بودجە بۆیان لە بودجەی ساڵی 2027ی عیراق.

جێگری سەرۆک وەزیرانی هەرێم لە ساڵیادی جینۆسایدی ئێزدییەکان پەیامێکی بڵاوکردەوە و دەڵێت، جەخت لە پێویستیی کاری پێکەوەیی لایەنەکان بۆ جێبەجێکردنی داوا رەواکانی ئێزدییەکان دەکەنەوە.

قوباد تاڵەبانی، جێگری سەرۆک وەزیرانی هەرێم لە هەژماری تایبەتی خۆی لە فەیسبوک پەیامێکی بڵاوکردووەتەوە و نووسیویەتی، "لە 12هەمین ساڵیادی جینۆسایدی خوشک و برایانی ئێزیدیماندا لەلایەن تیرۆریستانی داعشەوە، یادی هەموو قوربانیانی ئەو مەرگەساتە گەورەیە بەرز و پیرۆز رادەگرین".

هەر لە پەیامەکەیدا ئاماژی بەوەشکردووە، "جەخت دەکەینەوە لەسەر پێویستیی کاری هاوبەش و پێکەوەیی هەموو لایەنە کوردستانییەکان لەسەر ئاستی عیراق و نێودەوڵەتییدا بۆ جێبەجێکردنی داوا رەواکانی هاوڵاتییانی ئێزیدی و پاراستنی مافەکانیان".