پاسەوانی سنوری عیراق هەوڵێكی بەقاچاغبردنی نزیكەی سەد هەزار حەبی كەپتاگۆنی پوچەڵكردەوە كە لەناو باڵۆندا شاردرابوونەوە.

فەرماندەیی هێزەكان پاسەوانی سنوری عیراق  بڵاویكردەوە، لە درێژەی هەوڵەكانیان بۆ بەرەنگاربوونەوەی قاچاخچێتی و رێگریكردن لە دزەكردنی مادەی هۆشبەر بۆ ناو عیراق، فەوجی یەكی لیوای شەشی سنوریی، توانی هەوڵێكی بەقاچاغبردنی بڕی 95 هەزار حەبی كەپتاگۆن پوچەڵ بكەنەوە كە لەناو باڵۆنی گەرمی هەواییەدا و لەناو 102 كیسەی نایلۆندا حەشاردرابوون.

ئاماژەی بەوەشكرد، هەر لەو ئۆپەراسیۆنەدا كیلۆیەك و 600 گرام لە جۆرێكی تری مادەی هۆشبەر دەستی بەسەرداگیراوە.

 راشیگەیاندوە، هێزەكانیان بەرەوامدەبن لە چاودێریكردنی ناوچە سنوریەكان بەئامانجی شكستپێهێنانی هەوڵەكانی تۆڕەكانی بەقاچاغبردنی مادە هۆشبەرەكان .

ئاژانسی نێودەوڵەتی وزەی ئەتۆم دەڵێت، لەم هەفتەیەدا پشكنینی دامەزراوە ئەتۆمییەكانی ئێران دەستپێدەكاتەوە و ئێرانیش دەڵێت ئەوەی دەوترێت تەنها خەیاڵێكی بەڕێوەبەری ئاژانسەكەیە.

رافایل گرۆسی بەڕێوەبەری گشتی ئاژانسی نێودەوڵەتی وزەی ئەتۆم رایگەیاند، بەپێی رێككەوتن و ئەو هەماهەنگییانەی كراوە، بڕیارە لەم هەفتەیەدا پشكنەرانی ئاژانسەكە بگەڕێنەوە بۆ ئێران بە مەبەستی دەستپێكردنەوەی پشكنین لە بنكە و دامەزراوە ئەتۆمییەكانی ئەو وڵاتە.

وتیشی، ئەگەر سزا نیودەوڵەتییەكانی سەر ئێران كارا بكرێنەوە، پێویستە دڵنیاییان پێبدرێت كە دەتوانن بەردەوام بن لە كاركردن لەگەڵ ئێران و ئەگەر ئەوەش روبدات پەیوەندی و راوێژ و دانوستانیان لەگەڵ ئەو وڵاتە بەردەوام دەبێت لە پێناو گەیشتن بە رێككەوتن.

ئیبراهیم عەزیزی سەرۆكی لیژنەی ئاسایشی نەتەوەیی و كاروباری دەرەوەی پەرلەمانی ئێرانیش رایگەیاند، ناردنی پشنكەرانی ئاژانسی نێودەوڵەتی وزەی ئەتۆم دوورە لە راستییەوە و تەنها خەیاڵێكی گروسییە كە دەیەوێت لە ناو ئێران كار بۆ ئەمریكا بكات و راپۆرتێك بەنهێنی بەرزبكاتەوە لە بارەی زیانەكانی بنكە ئەتۆمییەكانی ئێران.