دەزگای لوتکە بۆ کاروباری ئاوارە و پەنابەران رایگەیاندووە، لە سێ مانگی سەرەتای ئەمساڵدا ئەڵمانیا زیاتر لە شەش هەزار پەنابەری دیپۆرت کردووەتەوە.

دەزگای لوتکە بۆ کاروباری ئاوارە و پەنابەران رایگەیاندووە، ئەڵمانیا بەشێوەیەکی چڕ دەستی کردووە بە ناردنەوەی پەنابەران بۆ وڵاتەکانی خۆیان، یان بەپێی رێککەوتننامەی 'دبلن' بۆ ئەو وڵاتەی لە رێگەیەوە چوونەتە وڵاتەکەیەوە.

بەپێی ئەو زانیارییانەی دەزگای لوتکە بڵاویکردووەتەوە، تەنها لە سێ مانگی سەرەتای ئەمساڵدا، ئەڵمانیا شەش هەزار و 151 پەنابەری دیپۆرت کردووەتەوە، کە ئەمەش بەراورد بە چارەکی سەرەتای دوو ساڵی رابردوو، زۆرترین رێژەی ناردنەوەی پەنابەرانە.

ئەوەش هاتووە، لەو ژمارەیەی دیپۆرت کراونەتەوە، 157 کەسیان بۆ عیراق و پێنج کەسیان بۆ ئێران بوون، هەروەها نزیکەی هەزار و 700 کەسیشیان بەپێی رێککەوتننامەی دبلن دیپۆرت کراونەتەوە، ئەمەش واتە دەگەڕێنرێنەوە بۆ یەکەم وڵاتی یەکێتی ئەوروپا کە لەکاتی پەنابەریدا پێی گەیشتوون.

لەو شەش هەزار کەسەی دیپۆرت کراونەتەوە، زۆرترینیان بۆ تورکیا، جۆرجیا، فەرەنسا، ئیسپانیا و سربیا بوون. هەروەها دیپۆرتکردنەوەی بەکۆمەڵیش هەبووە کە یەکێک لەو وڵاتانەی بەکۆمەڵ دیپۆرتی بۆ کراوە پاکستان بووە و تێچووی گەشتەکەش زۆر بووە و گەیشتووەتە 462 هەزار یۆرۆ.

هەربەپێی راپۆرتەکەی دەزگای لوتکە، ئەوەی بووەتە جێگەی سەرنج، لە هەندێک کاتدا مامەڵەی توندی پۆلیس بووە لەگەڵ پەنابەران، هەروەها ماماڵەیەکی نائاسایی لەگەڵیاندا بەوەی هەندێک جار پەنابەریان لە نەخۆشخانە دەرهێناوە بۆ ناردنەوەی.

د.لەتیف رەشید سەرۆک کۆماری عیراق، ئەمڕۆ یەکشەممە25ـی 5ـی 2025، لەکۆشکی بەغداد، پێشوازی لە شو دۆنیۆ بەڕێوەبەری گشتی رێکخراوی خۆراک و کشتوکاڵی نەتەوە یەکگرتووەکان (فاو) و وەفدی یاوەری کرد.

لەمیانی دیدارەکەدا باسیان لەهاریکاری تەکنیکی نێوان عیراق و رێکخراوی (فاو) و چۆنیەتی بەرزکردنەوەی ئاستیان بۆ پشتیوانیکردنی کەرتەکانی کشتوکاڵ وبەرهەمە کشتوکاڵیەکان و باشترکردنی کوالێتی تۆو و پاراستنی بەپیتی خاک و روبەڕوبونەوەی ئاستەنگەکانی پەیوەست بە ئاسایشی خۆراک کرد، جگە لە ئاڵوگۆڕکردنی شارەزایی تەکنیکی و تەکنەلۆژی لە نێوان هەردوولا.

سەرۆک کۆمار جەختی لە گرنگی پابەندبون بەڕاسپاردەکانی نەتەوە یەکگرتووەکان لە بواری بەڕێوەبردنی ئاو و کەمکردنەوەی بەفیڕۆدان و هاوکاری نێوان وڵاتانی دراوسێ کردەوە، بەمەبەستی پاراستنی سەرچاوە ئاوییەکان و کارکردن بۆ پاراستنی ژینگە، بە ئاماژەدان بەوەی کە گۆڕانی کەشوهەوا ئاستەنگێکی گەورەیە بۆ ناوچەکە، بەتایبەت لە عیراق بەهۆی دابەزینی ئاستی ئاوی روبارەکانی دیجلە و فورات و وشکەساڵی و بەبیابانبون و کاریگەرییە گەورەکانیان لەسەر کەرتی کشتوکاڵ.

سەرۆک کۆمار دووپاتی کردەوە لە پێویستی هاوکاری و هەماهەنگی هاوبەش لەگەڵ وڵاتانی دراوسێ بۆ تێپەڕاندنی قەیرانی ئاو و سود وەرگرتن لە یاسا نێودەوڵەتییەکان بۆ رێکخستن و دابەشکردنی ئەم سەرچاوەیە، هاوکات جەختیشی لەوە کردەوە کە عیراق لەئێستادا سەرنجی لەسەر بەدەستهێنانی پشکێکی دادپەروەرانەیە لە ئاو.

لەلای خۆیەوە شو دۆنیۆ، پێزانینی گەورەی خۆی بۆ ئەو پێشکەوتن و گەشەپێدانەی کە لە عیراقدا بەدی دەکرێت، چ لە شارەکان و چ لە روی کشتوکاڵدا دەربڕی، جەختیشی لە پابەندبوونی رێکخراوی (فاو)  کردەوە بۆ بەردەوامبوونی هاوکاریی دوولایەنە لە بوارە جیاوازەکاندا لە چوارچێوەی پسپۆڕی خۆیدا.

لە دیدارەکەدا هەر یەک لە یاریدەدەری بەڕێوەبەری گشتی رێکخراوی (فاو) و نوێنەری هەرێمی بۆ رۆژهەڵاتی نزیک و باکووری ئەفریقا د.عەبدو لحەکیم واعر و نوێنەری (فاو) لە عیراق د.سەلاح حاجی حەسەن، ئامادە بوون.