سەعات 12ـی ئەم نیوەڕۆیە کۆنفڕانسی هەردوو ئاڕاستەکەی بزوتنەوەی گۆڕان دەستپێدەکات، هەردوو ئاراستەکەی بزوتنەوەکە بۆچوونی جیاوازیان هەیە لەسەر هەڵبژاردنی رێکخەری گشتی.

شاخەوان رەئوف ، وتەبێژی گۆڕانی ئاڕاستەی کوردسات، لەبەردەم هۆڵی كۆنفڕانس لە شاری سلێمانی لە كۆنفڕانسێکی رۆژنامەوانیدا رایگەیاند: كۆنفڕانسی بزوتنەوەی گۆڕان بۆ یەکخستنەوە و سەرپێخستنەوە و زیاتر بەدامەزراوەییكردنی بزوتنەوەی گۆڕانە، لەو روانگەیەشەوە پەیڕەوی ناوخۆ گۆڕانکارییەکى کەمى تێدا کراوە و دەمانەوێت رێکخەرى گشتى لەناو کۆنفڕانس هەڵبژێردرێت و ئەوەش لە بنەماکانى دیموکراسییە.

وتیشی: دەمانەوێت کۆنفڕانسەکە لە خزمەت گۆڕانخوازان و دەنگدەراندا بێت بۆیە بەلامانەوە گرنگە کۆنفڕانسەکە سەرکەوتوو بێت و بزوتنەوەی گۆڕان بباتە قۆناغێكی باشتر و گرنگتر و بەرەو دامەزراوەییتری ببات.

لە بەرانبەریشدا عەبدوڵا چۆمانی وتەبێژی گۆڕانی ئاڕاستەی گردەکە رایگەیاند: نامانەوێت رێکخەر و ئەندامانی خانە لە ناو هۆڵی کۆنفڕانس هەبژێردرێت، بەڵکو دەبێت لە دوای ئەنجامدانی کۆنفڕانس هەبژێردرێن.

وتیشی: هەمواری دەستوورمان کردەوەتەوە و رێکخەر و خانەمان وەک خۆی هێشتووەتەوە.