بەپێی راگەیەندراوێکی سەرۆکایەتی ھەرێم، ئەمڕۆ نێچیرڤان بارزانی سەرۆکی ھەرێم لەگەڵ وەفدێکی باڵای سەربازیی بەریتانیان بە سەرۆکایەتی مارشاڵ سامی سامپسۆن گەورە ڕاوێژکاری بەرگریی بەریتانیا لە ڕۆژھەڵاتی ناوەڕاست و باکوری ئافریکا کۆبووەتەوە کە لە ژمارەیەک لە پلەداران و بەرپرسانی باڵای سەربازیی بەریتانی پێکھاتبوو.

لە کۆبوونەوەیەکدا، کە خاتوو ڕۆژی کەیڤ کونسوڵی گشتی بەریتانیا لە ھەرێم ئامادەی بوو، دۆخی ئەمنیی عێراق و ھەرێمی کورستان و چاکسازییەکانی وەزارەتی پێشمەرگە و ھاریکاریی ھاوبەشی ئەمنی تاوتوێکران، ھەردوولا جەختیان لە گرنگی سەرخستنی پرۆسەی ڕێکخستنەوە و یەکخستنی پێشمەرگە و چاکسازییەکانی وەزارەتی پێشمەرگە کردەوە و ئاماژەیان بەوەدا کە دەبێت پڕۆسەکە بەشێوەیەکی کاراتر بەڕێوەبچێت. 

ھاوکات وەفدەکەی بەریتانیا دووپاتیانکردووەتەوە کە وڵاتەکەیان بە بایەخەوە لە ئارامی و سەقامگیریی ئەمنیی عێراق و ھەرێمی کوردستان دەڕوانێت و لە پێشکەشکردنی ھاوکاری و پشتگیریی ئەمنی بۆ پاراستنی ئارامی و سەقامگیریی عێراق و ھەرێمی کوردستان و سەرخستنی پرۆسەی چاکسازی و یەکخستنەوەی پێشمەرگە، بەردەوام دەبێت.

وەفدێکی باڵای سەربازیی بەریتانیا رایگەیاند، لە پشتیوانیکردنی پڕۆسەی ڕێکخستنەوە و یەکخستنی پێشمەرگە بەردەوام دەبن و داواشدەکات پرۆسەکە بەشێوەیەکی کاراتر بەڕێوەبچێت.