یەکێک لەو جوتیارانی رێگری لێکرا دانەوێڵەکەی دروێنە بکات بە کوردسات نیوزی راگەیاند، لەکاتی دروێنەدا چەند ئۆتۆمبێلێکی سەربازی ھاتوونەتە سەریان و بە تەقەکردن و ھەڕەشەی دەستگیرکردن، رێگەیاننەداوە گەنمەکەیان دروێنە بکەن.

بە وتەی ئەو جوتیارە کوردە، ھێزەکانی سوپای عێراق رێگەیا نەداوە دەڕاسەکە عەمبارەکەی بەتاڵبکاتە ناو بارھەڵگر و بەزۆر پێیان رشتووەتەسەر زەوی، ئەوەش زیانی زۆری پێگەیاندوون.
وتیشی، سوپای عێراق بەبیانووی ئەوەی زەوییەکانیان موڵکی دەوڵەتە رێگری لە دروێنەکردن کردووە.

لەچەند رۆژی رابردوودا جوتیارانی کورد لە تۆپزاوا گردبوونەوە و رایانگەیاند، لەسەردەمی حکومەتەکەی نوری مالکی بڕیارەکانی لیژنەکانی کاروباری باکور لەبارەی بەخشینی زەوییەکانیان بە وەزارەتی بەرگری و گرێبەستی جوتیارە عەرەبە ھاوردەکان ھەڵوەشاندوەتەوە، بەڵام وەزارەتی بەرگری ئێستا داوای زەوییەکانیان دەکات و عەرەبە ھاوردەکانیش لە دادگای کەرکوک سکاڵایان لە دژ تۆمارکردوون.