سەرۆکی هەرێمی کوردستان پەیامێکی لەبارەی لەناوبردنی چەک لەلایەن بەشێک لە گەریلاکانی پەکەکەوە بڵاوکردەوە و ئاماژەی بەوەکردووە، ئه‌م هه‌نگاوه‌ پرۆسه‌ى ئاشتى ده‌باته‌ قۆناغێكى نوێ‌ و هه‌نگاوى ديكه‌ى كرده‌يى به‌دوادا دێت.

نێچیرڤان بارزانی سەرۆکی هەرێم رایگەیاندووە، پێشوازی لەو هەنگاوەی ئەمڕۆی پارتی كرێكارانی كوردستان پەكەكە بۆ چەكدانان دەكەن. پابەندی هەرێمیش بۆ سەرخستنی پرۆسەکە دووپات دەکاتەوە.

ئاماژەی بەوەشکردووە، "ئەمە هەنگاوێكی دیكەی گرنگ و دڵخۆشكەری سەرخستنی پرۆسەی ئاشتی بوو و دڵنیاین ئەم هەنگاوە پرۆسەی ئاشتی دەباتە قۆناغێكی نوێوە و هەنگاوی دیكەی كردەیی بەدوادا دێت كە پرۆسەكە بە ئاراستەیەكی دروستدا دەباتە پێشەوە".

 لە راگەیەنراوەکەدا ئەوەش هاتووە، ناوچەكە بە قۆناغ و دۆخێكی هەستیاردا تێدەپەڕێت و داوا لە لایەنەكان دەكات كە هەموو هەوڵێك لەپێناو سەرخستنی ئاشتیدا بدەن، چونكە لە ئاشتیدا هەمووان براوەن و سەركەوتنی ئاشتی، خزمەت بە توركیا و تەواوی ناوچەكە و هەموو لایەك دەكات.

لە کۆتاییشدا سەرۆکی هەرێم نووسیویەتی: سوپاس و پێزانين و ده‌ستخۆشيمان بۆ جه‌نابى سه‌رۆك ئه‌ردۆغان و ده‌ستپێشخه‌رى و پشتگيرى و هه‌وڵه‌كانى بۆ سه‌رخستنى پرۆسه‌ى ئاشتى، دووپات ده‌كه‌ينه‌وه‌. هه‌روه‌ها به‌ ڕێزه‌وه‌ له‌ ڕۆڵى به‌ڕێزان باخچه‌لى و ئۆجالان و هه‌موو ئه‌وانه ده‌ڕوانين‌ كه‌ كار له‌پێناو سه‌رخستنى ئاشتيدا ده‌كه‌ن.

 

ئەو گەریلانەی پەكەكە كە چەكەكانیان لەناوبرد بە ناوی گروپی ئاشتی و كۆمەڵگەی دیموكراتی راگەیەنراوێكیان بڵاوكردەوە و تێیدا هاتووە: وەكو وەڵامێك بۆ بانگەوازەكەی ئۆجەلان چەكەكانمان لەناوبرد.

ئەمڕۆ لە رێورەسمێکی رەسمیدا لە ئەشکەوتی جاسەنە لە سلێمانی بەشێک لە گەریلاکانی پەکەکە چەکەکانیان لەناوبرد و ئاماژە بەوەدەکەن، هاوڕان لەگەڵ بانگەوازی عەبدوڵا ئۆجەلان رابەری باڵای پەکەکە، لەبارەی بڕوابوون بە ئاشتی کۆمەڵایەتی و هێزی سیاسی نەوەک چەک.

ئەوەش هاتووە، وەک وەڵامێک بۆ بانگەوازی ئۆجەلان چەکەکانیان لەناوبردووە و هیواش دەخوازن، "ئەم هەنگاوە ببێتە مایەی خێر و خۆشی بۆ گەل، بۆ گەلانی توركیا و رۆژهەڵاتی ناوەڕاست و سەرجەم مرۆڤایەتی".

 

دەقی راگەیەنراوەکە:

ئەمڕۆ پرۆسەی لەناوبردنی چەکی بەشێک لە گەریلاکانی پەکەکە لە ئەشکەوتی جاسەنە بەڕێوەدەچێت و لە قەزای دوکان و قەندیلیشەوە نوێنەری لایەنەکان ئامادەن و چاودێری پرۆسەکە دەکەن.

ئەشکەوتی جاسەنە بەشێکی دانەبڕاوە لە مێژووی شۆڕشی کورد، کە بە دووری 50 کیلۆمەتر دەکەوێتە رۆژئاوای شاری سلێمانی لە ناحیەی سورداش، بە دیاریکراوی دەکەوێتە پشت گوندی کانی خان لە دامێنی بەرزایی نەبی ئاغا لە شاخی سارا.

ئەشکەوتەکە دەروازەیەکی سێگۆشەیی هەیە، درێژییەکەی 40 مەتر و پانییەکەی نۆ مەترە، هەروەها حەوت مەتر بەرزە و لە بەشی ناوەوەی لە دوو ژوور پێکدێت.

 

یەکەم رۆژنامەی شاخ و ئەشکەوتی جاسەنە

جاسەنە پێشتر بەکارهێنانێکی ئاسایی هەبووە، بەڵام بەگوێرەی کات و سەردەمەکان بەکارهێنانەکەی گۆڕاوە، بە جۆرێک لە ساڵی 1923 یەکەم رۆژنامەی شاخ لە مێژووی رۆژنامەگەری کوردیدا لەو ئەشکەوتەوە دەرکراوە بە ناوی "بانگی حەق".

لە سەردەمی شۆڕشی شێخ مەحموددا ئەشکەوتەکەی وەک پەناگە بەکارهێنا و سێ ژمارەی لە بانگی حەق بڵاوکردەوە.

لە شۆڕشی نوێشدا پێشمەرگە ئەشکەوتەکەی وەک پەناگەیەکی گرنگ دژ بە حزبی بەعسی دیکتاتۆر بەکارهێناوە.

ئێستاش ئەشکەوتەکە وەک شوێنەوارێکی مێژوویی لێی دەڕوانرێت و بەردەوام رێکخراوەکان سەردانی دەکەن و ساڵانەش خوێندنگەکان گەشتی زانستیی بۆ خوێندکاران رێکدەخەن بەمەبەستی پێناساندنی ئەشکەوتەکە بە نەوەکانی داهاتووی کوردستان.