پەیامنێری کوردسات نیوز رایگەیاند، ھونەرمەند (بڵند ئامێدی) ساڵی رابردوو ڤیدیۆیەکی ٣٠ چرکەیی بڵاوکردەوە کە تیایدا بە پارچە میوزیکێک پشتیوانی لە چالاکوانان و رۆژنامەنووسانی بادینان دەردەبڕێت. وتیشی، بەھۆی بڵاوکردنەوەی ئەو پارچە ڤیدیۆوە، ھەفتەیەک پێش ئێستا دادگای دھۆک سزای شەش مانگ زیندانی بەسەردا سەپاندووە.

بەپێی زانیارییەکانی کوردسات نیوز، بڵند ئامێدی پیشەی سەرتاشە و ساڵی رابردوو دوای بڵاوکردنەوەی ئەو پارچە میوزیکە دەستبەجێ ئاسایشی دھۆک ھەڵیانکوتایە سەر ماڵەکەی لە شاری دھۆک و دەستگیریانکرد و دوای ماوەیەک ئازاد کرا. ھەروەھا لە ساڵی رابردووەوە تائێستا چەند جارێک لەلایەن ئاسایشەوە دەستگیرکراوە و لێپرسینەوەیان لەگەڵداکردووە، لە دوایین جاریشدا کە دەستگیرکرا بەبێ دادگایی سێ مانگ لە ئاسایشی گشتی دھۆک زیندانی کرا و ئێستاش شەش مانگی تر سزای بەسەردا سەپێنراوە.