زیاد جەبار کە ھاوکات سەرۆکی فراکسیۆنی یەکێتییە لە پەرلەمانی کوردستان بە دەنگی ئەمریکای راگەیاند، مانگانە لە داھاتی فرۆشتنی نەوت بڕێک پارە دەنێردرێت بۆ پارێزگاکانی سلێمانی و ھەڵەبجە و بڕێکیش بۆ پارێزگاکانی دھۆک و ھەولێرە، بەڵام ئەو بڕەی بۆ سلێمانی دیاریدەکرێت، مانگانە ٤٣٪یە و ھیچ حساباتێک لەسەر ئەوەنییە کە داھاتی سلێمانی لەو مانگەدا چەند بووە.

وتیشی، داھاتی ناوخۆی سلێمانی بۆ بودجەی بەکاربردنی پارێزگاکانی سلێمانی و ھەڵەبجە و پڕۆژە خزمەتگوزارییەکان و کڕینی دەرمان و خۆڵ و خاشاک بەکاردەھێندرێت، جگە لەوەش مانگانە ١٥ ملیار لە داھاتی سلێمانی بۆ بودجەی بەکاربردنی سێ سەرۆکایەتییەکە دەڕوات، کە وایلێھاتووە داھاتی سنوری پارێزگای سلێمانی بەشی تەموویلی مووچە و پێداویستییەکانی دامودەزگاکان و خزمەتگوزارییەکانی سنوری سلێمانی ناکات و وایلێھاتووە ئێستا نزیکەی ٣٥ ملیار مانگانە کورتدەھێنێت.

زیاد جەبار وتیشی، کێشەی مووچەی سلێمانی پەیوەندی بە ململانێی سیاسییەوە ھەیە کە حکومەتی ھەرێم دەیکات و ئەگەر حکومەت مووچەی مووچەخۆرانی لە ململانێکان بھێنێتە ‌دەرەوە، گرفتی دواکەوتنی مووچەی فەرمانبەرانی سلێمانی کۆتایی دێت.