لە سەرەتای کۆبوونەوەکەدا سەرۆکی یەکێتیی نیشتمانیی کوردستان وێڕای پیرۆزبایی ھاتنی جەژنی پیرۆزی قوربان لە کۆمەڵانی خەڵکی کوردستان و عیراق، کورتەیەکی لەسەر دواھەنگاوەکانی وەفدی دانوستانی یەکێتی لە بەغدا لەگەڵ لایەنە سیاسییەکانی عیراق، باڵیۆز و نوێنەرایەتی وڵاتان پێشکەشکرد و ئاماژەی بەوەدا، ھەموو لایەنەکان لەسەر سیاسەتی ڕاست و دروستی یەکێتی کۆکن کە بە شێوەیەکی ڕاستەوخۆ داکۆکی لە پرەنسیپەکانی سازان، ھاوسەنگی و شەراکەت دەکات و ئەم پرەنسیپانەش درێژەدانە بە ھەمان سیاسەتی سەرۆک مام جەلال لە سەردەمی زێڕینی رۆڵی کورد لە بەغدا.

کۆبوونەوەی مەکتەبی سیاسی ھەڵوەستەی لە ئاستی ڕەوشی دیالۆگی یەکێتی و ھێز و لایەنە عیراقییەکان کرد کە بەھۆی یەکڕیزی، یەکئاڕاستەیی و یەکدەنگی حزبییەوە  ئەمڕۆ بە سەربەرزییەوە ماڵی سەرۆک مام جەلال لە بەغدا بووەتە شوێنی پێکگەیشتنی ئاڕاستە، دید و بۆچوونە جیاوازەکان و دیدارەکانی سەرۆک بافڵ جەلال تاڵەبانی درێژەی ھەمان کەلتووری سەنگینی سەرۆک مام جەلالە بۆ دروستکردنی ڕایەڵەی پەیوەندی نێوان پێکھاتەکان و پاراستنی ئیستحاقە دەستورییەکانی گەلەکەمان لە عیراقی نوێ.

لە بەشێکی تری کۆبوونەوەکەدا گفتوگۆ لەسەر دۆخی ژیان و گوزەرانی ھاوڵاتییانی ھەرێمی کوردستان و عیراق کرا و لەمبارەیەوە وێڕای پشتیوانی لە چاکسازییە حزبی و حکومییەکان و پشتیوانی لە حکومەتی ھەرێمی کوردستان و تیمی یەکێتیی لە حکومەت، تەئکیدکرایەوە کە پێکھێنانی حکومەتی داھاتووی عێراق و سەنگی سیاسەتی یەکێتی لە پایتەختی فیدراڵی ڕێ بۆ باشترکردنی ژیان و گوزەرانی خەڵکی ھەرێمی کوردستان خۆشتر دەکات بەو پێیەی ھاوکات لەگەڵ پەرەپێدانی پەیوەندییەکانی ھەرێم و بەغدا دۆسییەکانی وەک بودجە، مووچە و شایستەکانی تری گەلەکەمان لە دۆخی کەرکوک و ناوچە دابڕاوەکان کە بەشێکی دانەبڕاوی سیاسەتی یەکێتییە، بەرەو چارەسەر ھەنگاو دەنێت.

لە کۆتاییدا مەکتەبی سیاسی پێداگری یەکێتی لە ئیستیحقاقی سەرۆککۆمار و کاندیدی پەسەندکراوی خۆی بۆ ئەو پۆستە دووپاتکردەوە و تەئکیدیشی لەسەر پێویستی پێکھێنانی حکومەتێکی ھاوسەنگ، تەوافوق و خزمەتگوزار کردەوە کە مەبەستی سەرەکی لە پێکھێنانی ئەو حکومەتەش خزمەتکردنی ھاوڵاتییان و باشترکردنی ژیان و گوزەرانیان بێت.