پێنج ناوچەی شرناخ لە باكوری كوردستان وەك ناوچەی ئەمنی تایبەت ناسێنرا و بۆ ماوەی نۆ رۆژ قەدەغەی هاتوچۆیان تێدا راگەیەنرا.

قائیمقامی ناوەندی شرناخ لە راگەیەنراوێكدا ئاماژەی بەوەكردووە، پێنج ناوچە لە سنوری شرناخ وەك ناوچەی ئەمنی تایبەت ناسێنراون و لە ئەمڕۆوە تا 5ی مانگی داهاتوو، قەدەغەی هاتوچۆیان تێدا راگەیەنراوە.

ئەوەش لە كاتێكدایە لە ئێستادا پرۆسەی ئاشتی لە توركیا جێبەجێ دەكرێت، پارتی كرێكارانی كوردستان "پەكەكە"ش لە 1ی ئازاری رابردوو ئاگربەستی راگەیاند و هیچ جموجوڵێكی سەربازیی لەو سنورە نەكراوە.

ترەمپ و ناتانیاهۆ رێككەوتن لەسەر كۆتاییهێنان بە شەڕی غەززە لە ماوەی دوو هەفتەدا و سەرجەم بارمتەكانیش ئازاد دەكرێن.

میدیاكانی ئیسرائیل بڵاویانکردەوە، دۆناڵد ترەمپ سەرۆكی ئەمریكا و بنیامین ناتانیاهۆ سەرۆك وەزیرانی ئیسرائیل رێككەوتن لەسەر كۆتاییهێنان بە شەڕی غەززە و فراوانتركردنی هاوپەیمانێتی ئیبراهیمی و سەرجەم بارمتەكانیشی ئازاد دەكرێن.

جەختیشیان کردەوە، بەپێی ئەو رێككەوتنە چوار وڵاتی عەرەبی لە ناویاندا ئیماڕات و میسر، غەززە بەڕێوەدەبەن و بزوتنەوەی حەماس لە كەرتی غەززە دووردەخەنەوە و لە دەرەوەی هاوكێشەكان دەبێت.

ئاشکراشیانکرد، "سوریا و سعودیە لە قۆناغی ئاساییكردنەوەی پەیوەندیەكانن لەگەڵ ئیسرائیلدا و بەشێك لە وڵاتە عەرەبی و ئیسلامیەكانیش دەچنە ناو هاوپەیمانی ئیبراهیمی".

میدیاكانی ئیسرائیل ئاماژەیان بەوەشکرد، ناتانیاهۆ لە مانگی داهاتوودا سەردانی كۆشكی سپی دەكات و غەززە و هاوپەیمانی ئیبراهیمی بابەتی سەرەكی گفتوگۆكان دەبێت.

رابەری شۆڕشی ئیسلامی ئێران رایگەیاند، ئەمریکا لە تێکشکاندنی بنکە ئەتۆمییەکان شکستی هێناوە. دەشڵێت: زللـەیەکی بەهێزمان لە ئەمریکا دا.

عەلی خامنەیی رابەری شۆڕشی ئیسلامی ئێران پەیامێکی ڤیدیۆیی بڵاوکردەوە و باسی لەوەکرد، ئەمریکا لە تێکشکاندنی بنکە ئەتۆمییەکانی ئێران شکستی هێنا و هیچ دەستکەوتێکی لەو شەڕەدا بەدەست نەهێنا.

باسی لەوەشکرد، ئیسرائیل نزیکبوو لە داڕمان و لەناوچوون، ئەمریکا دەیزانی ئەگەر بەشداری شەڕەکەی نەکردایە ئیسرائیل لەناودەچوو.

ئەوەشی خستووەتە روو، پیرۆزبایی سەرکەوتنی شەڕەکە لە ئێرانییەکان دەکات و دەشڵێت: بەسەر ئەمریکادا سەرکەوتین و ئێران زللـەیەکی بەهێزی لە دەموچاوی ئەریکا دا.